ތަޖުރިބާކާރު މިޑްފީލްޑަރު ލޫކާ މޮޑްރިޗަށް އާ ކޮންޓްރެކްޓެއް ހުށައަޅަން ރެއާލް މެޑްރިޑުން އެއްބަސްވެއްޖެއެވެ.
ރެއާލުގެ ބޯޑުން އެންމެ ފުރަތަމަ ނިންމާފައިވަނީ މި ސީޒަންގެ ނިޔަލަށް ހަމަވާ, މޮޑްރިޗްގެ ކޮންޓްރެކްޓް އާ ނުކުރުމަށެވެ. ނަމަވެސް މި ސީޒަނުގެ ފަހު ކޮޅުގައި މޮޑްރިޗްގެ ފަރާތުން ފެނިގެންދިޔަ މޮޅު ކުޅުމުން ރެއާލުގެ ބޯޑު ވަނީ އޭނާއަށް އިތުރު ކޮންޓްރެކްޓެއް ހުށައެޅުމަށް އެއްބަސްވެފައެވެ.
ކުޅިވަރު މީޑިއާއެއް ކަމުގައިވާ މާސާ ހާމަކުރި ގޮތުގައި މޮޑްރިޗް ރެއާލުގައި މަޑުކުރަން އެއްބަސްވީ އޭނާގެ މުސާރައިގެ ވަރަށް ބޮޑު ބައެއް އުނިކުރާ ގޮތަށެވެ. މޮޑްރިޗްގެ އަމާޒަކީ ރެއާލަށް ކުޅެދިނުން ކަމުގައިވާތީ މުސާރަ ކުޑަ ކުރިކަމުގައިވިއަސް މޮޑްރިޗް ރެއާލުގައި މަޑުކުރަން ވަނީ އެއްބަސްވެފައެވެ.
މޮޑްރިޗް ވަނީ ރެއާލުގައި އޭނާ ހޭދަކުރި 13 އަހަރު ތެރޭގައި އެ ކްލަބަށް 532 މެޗު ކުޅެދީ, 25 ތަށި ކާމިޔާބު ކޮށްފައެވެ. އޭގެ ތެރޭގައި ހިމެނެނީ 5 ޗެމްޕިއަންސް ލީގު, 5 ކްލަބް ވޯލްޑް ކަޕް, 4 ޔޫރަޕިއަން ސުޕާ ކަޕް, 4 ލަލީގާ, 2 ކޮޕާ ޑެލްރޭ އަދި 5 ސްޕެނިޝް ސުޕާ ކަޕެވެ.
