ޗެލްސީގެ އާ ކޯޗަކަށް އިޓަލީގެ ކޯޗެއް ކަމުގައިވާ އެންޒޯ މަރެސްކާ ހަމަޖައްސައިފިއެވެ.
ޗެލްސީއިން މަރެސްކާ ކޯޗުގެ ގޮތުގައި ހަމަޖެއްސީ މި ދިޔަ ސީޒަނުގައި އެ ކްލަބަށް ކޯޗުކޮށްދިން މައުރީސިއޯ ޕޮޗެޓީނޯ އެ ކްލަބު ދޫކޮށްލުމުންނެވެ.
ޕޮޗެޓީނޯގެ އިރުޝާދު ދަށުން ޗެލްސީ ވަނީ ކަރަބައޯ ކަޕުގެ ފައިނަލަށް ދަތުރުކޮށް, އިނގިރޭސި ޕްރިމިއާ ލީގުގެ ހަވަނައިގައި ސީޒަން ނިންމާލާފައެވެ. ޗެލްސީގެ ފަރާތުން ސީޒަނުގެ ފަހު ކޮޅުގައި ފެނިގެންދިޔަ މޮޅު ކުޅުމުގެ ސަބަބުން ގިނަ ފަރާތްތަކުން ލަފާ ކުރަމުން އައީ ދެން އަންނަ ސީޒަނުގައި ވެސް ޕޮޗެޓީނޯ އެ ޗެލްސީގައި މަޑު ކުރާނެ ކަމަށެވެ. ނަމަވެސް ޗެލްސީގެ މެނޭޖްމަންޓާ ޕޮޗެޓީނޯއާ ދެމެދު ދިމާވި ދެބަސްވުންތަކެއްގެ ސަބަބުން ޕޮޗެޓީނޯ ވަނީ ޗެލްސީ ދޫކޮށްލަން ނިންމާފައެވެ.
ޕޮޗެޓީނޯގެ ބަދަލުގައި ޗެލްސީއިން އައްޔަނުކުރި އެންޒޯ މަރެސްކާއަކީ މި ވަގުތު ލެއިސެސްޓާ ސިޓީގެ ކޯޗެވެ. މަރެސްކާގެ ސޮއި ޔަގީން ކުރުމަށް ޓަކައި ޗެލްސީ ވަނީ ލެއިސެސްޓާއަށް 10 މިލިއަން ޕައުންޑުގެ އަދަދެއް ދެއްކުމަށް އެއްބަސްވެފައެވެ. ޗެލްސީއިން މަރެސްކާއަށް ހުށައެޅި ކޮންޓްރެކްޓަކީ 2029 ވަނަ އަހަރުގެ ޖޫން މަހުގެ ނިޔަލަށް ހަމަވާ ކޮންޓްރެކްޓެކެވެ.
މަރެސްކާ ވަނީ ނިމިދިޔަ ސީޒަނުގައި އިނގިރޭސި ފުޓުބޯޅައިގެ ދެވަނަ ޑިވިޝަނުގައި ކުޅުނު ލެއިސެސްޓާ ސިޓީއަށް ލީގު ކާމިޔާބު ކޮށްދީ, އެނބުރި ޕްރިމިއާ ލީގަށް ގެނެސްދީފައެވެ. މަރެސްކާ ވަނީ މީގެ ކުރިން އިޓަލީގެ ކްލަބެއް ކަމުގައިވާ ޕާމާ ސްޕޯޓްސް ކްލަބަށް ކޯޗުކަން ކޮށްދީފައެވެ. މަރެސްކާގެ އެންމެ ފާހަގަކޮށްލެވޭ ކަމަކީ އޭނާ ވަނީ މެންޗެސްޓާ ސިޓީގައި ޕެޕް ގާޑިއޯލާގެ ދަށުން އެސިސްޓަންޓް ކޯޗެއްގެ ގޮތުގައި މަސައްކަތް ކޮށްފައި ކަމެވެ.
