ފުލުހުންގެ ޚިދުމަތް ދިނުމަށް ޒަމާނީ އަދި މަތީ ތައުލީމާއި ތަމްރީނަކީ ވަރަށް މުހިންމު ކަމެއްކަމަށް ހޯމް މިނިސްޓަރު ޢަލީ އިޙްސާން ވިދާޅުވެއްޖެއެވެ.
މިނިސްޓާރު މިފަދައިން ވިދާޅުވެފައިވަނީ ފުލުހުންގެ 36 ވަނަ އަސާސީ ތަމްރީނު ކޯސް ނިންމުމަށް ނޭޝަނަލް ކޮލެޖް އޮޕް ޕޮލިސިންގ އެންޑް ލޯ އެންފޯސްމަންޓުގައި ރޭ ބޭއްވި ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ. މިވާހަކަފުޅުގުގައި އަސާސީ ތަމްރީނު ކޯސް ފުރިހަމަކޮށް ފުލުހުންެގެ ސަފުތަކާ ގުޅިގެން ގައުމީ ޚިދުމަތަށް ނުކުތް ޓްރެއިންޑް ފުލުހުންނަށް ރައީސުލް ޖުމްހޫރިއްޔާ ޑރ. މުޙައްމަދު މުއިއްޒުގެ ނަންފުޅުގައި މަރުހަބާ ދެންނެވިއެވެ.
މިނިސްޓާރު ވިދާޅުވީ އަސާސީ ތަމްރީނު ކޯހެއް ނިމޭ ދުވަސް ނުވަތަ ޓްރެއިންޑު ފުލުހަކަށްވާ ދުވަސް އެއީ ކޮންމެ ފުލުހެއްގެ ހަޔާތުގައި ވެސް އަންނަ އެންމެ މުހިންމު އެއްދުވަސް ކަމަށާ އަދި އެއީ ޚިދުމަތުގެ ކުރީކޮޅު ކޮންމެ ފުލުހަކަށް ވެސް ލިބިގެންދާނެ އެންމެ ބޮޑު ކާމިޔާބީކަމަށެވެ. މީގެއިތުރުން މިނިސްޓާރު ވިދާޅުވީ ދިވެހިން ފުލުހުންނަކީ ރާއްޖޭގެ ދާހިލީ ސަލާމަތާ ރައްކާތެރިކަން ބަލަހައްޓައިދޭ މުހިއްމު ދައުރެއް އަދާ ކުރާބަޔެއް ކަމަށެވެ. އަދި ދިވެހިރާއްޖޭގެ މުޖުތަމައު މަސްތުވާތަކެތީގެ ވަބާއިން ފުރިހަމައަށް ސަލާާމަތްވެފައިވާ މުޖުތަމައުއަކަށް ހެދުމައްޓާކައި ފުލުހުންގެ ދައުރުގެ ބޮޑުކަން ވެސް މިނިސްޓަރު ވަނީ ފާހަގަ ކުރައްވާފައެވެ. ހަމައެހެންމެ ދިވެހިރާއްޖޭގައި ގަވާއިދާ ހިލާފަށް އުޅެމުންދާ ބޭރު މީހުންގެ ކަންކަން ގާނޫނީ އިމަށް ގެނައުމަށް އެހީތެރިވުމަކީ މީގެ ތެރެއިން އެންމެ މުހިންމު ކަންކަަން ކަމަށް ވިދާޅުވިއެވެ. އަދި ތަމްރީނު ފުރިހަމަކޮށް ފުލުހުންގެ ސަފުތަކާ ގުޅޭ ފުލުހުންގެ ފަރާތުން މިދެންނެވި ކަންކަން ކާމިޔާބުކުރުމަށް، ވެރިންގެ އިރުޝާދާ އެއްގޮތަށް ގަދައަަޅައި މަސައްކަތްކުރުމަށް އެދިލެއްވިއެވެ.
