ސައުދީ ކިންގްސް ކަޕުގެ ފައިނަލުގައި ޕެނަލްޓީ ޖަހައިގެން އަލްނަސްރު އަތުން މޮޅުވެ އަލްހިލާލުން މުބާރާތުގެ ޗެމްޕިއަންކަން ހޯދައިފިއެވެ.
ސައުދީ އަރަބިއާގެ ކިންގް އަބްދުﷲ ސްޕޯޓްސް ސިޓީގައި ކުޅެވިގެންދިޔަ ފޯރިގަދަ ފައިނަލުގައި ދެ ޓީމުގެ ފަރާތުން ވެސް ފެނިގެންދިޔައީ ވަރުގަދަ ކުޅުމެކެވެ. މެޗުގައި އެންމެ ފުރަތަމަ ލީޑު ނަގާފައިވަނީ އަލްހިލާލެވެ. މި ލަނޑަކީ މެޗުގެ 7 ވަނަ މިނެޓުގައި އަލެކްސެންޑާ މިޓްރޮވިޗް ކާމިޔާބު ކޮށްދިން ލަނޑެކެވެ. މިޓްރޮވިޗްގެ މި ލަނޑާއެކު ފުރަތަމަ ހާފު ނިމުނު އިރު އަލްހިލާލު އޮތީ 1-0 އިން ކުރީގައެވެ.
ދެވަނަ ހާފުގައި ރަނގަޅު ކުޅުމެއް ދައްކަމުން ދިޔަ އަލްނަސްރަށް ދިމާވި އެންމެ ބޮޑު ގޮންޖެހުމަކީ މެޗުގެ 56 ވަނަ މިނެޓުގައި އެ ޓީމުގެ ގޯލްކީޕަރު ޑޭވިޑް އޮސްޕިނާއަށް ރަތް ކާޑު ދެއްކުމެވެ. އޮސްޕިނާއަށް ރަތް ކާޑު ދެއްކީ ގަސްތުގައި ޕެނަލްޓީ އޭރިއާ ބޭރުން ބޯޅައިގައި އަތް ލުމުންނެވެ.
10 ކުޅުންތެރިންނާއެކު ކުޅެމުންދިޔަ ކަމުގައިވިއަސް އަލްނަސްރު ވަނީ އަލްހިލާލުގެ ގޯލާ އަމާޒުކޮށް ނުރައްކާ ހަމަލާތަކެއް އުފައްދާފައެވެ. އަލްނަސްރުގެ ހަމަލާތައް މަތަކުރަމުން ދިޔަ އަލްހިލާލަށް ދިމާވި އެންމެ ބޮޑު މައްސަލައަކީ މެޗުގެ 87 ވަނަ މިނެޓުގައި އެ ޓީމުގެ ޑިފެންޑަރު އަލްބުލައިހީއަށް ރަތް ކާޑު ދެއްކުމުންނެވެ. އަލްބުހައިލީއަށް ރަތް ކާޑު ދެއްކީ ކުޅުންތެރިއެއްގެ މޫނުގައި ބޮލުން ޖެހުމުންނެވެ.
އަލްހިލާލުގެ މައި ޑިފެންޑަރަށް ރަތް ކާޑު ދެއްކުމުން އެކަމުގެ ފައިދާ ނަގައި އަލްނަސްރުން ވަނީ މެޗުގެ 88 ވަނަ މިނެޓުގައި ލަނޑު ޖަހާފައެވެ. މި ލަނޑަކީ އައިމަން ޔަހްޔާ ބޮލުން ޖަހާ ކާމިޔާބު ކުރި ލަނޑެކެވެ.
މެޗުގެ ނުވަދިހަ މިނެޓުގައި އަލްހިލާލުގެ ދެވަނަ ޑިފެންޑަރަކަށް ވަނީ ރަތް ކާޑު ދައްކާފައެވެ. އަލްހިލާލުގެ ކަލިޑޫ ކޮލިބަލީ, އަލްނަސްރުގެ ގޯލްކީޕަރުގެ ބޮލުގައި ފައިން ޖެހިކަމަށް ބަލާ ރަތް ކާޑު ދެއްްކުމުން އަލްހިލާލަށް ޖެހުނީ މެޗުގެ ބާކީ ބައި ދެ ކުޅުންތެރިން މަދުކޮށް ކުޅޭށެވެ.
މެޗުހެ ނަތީޖާ 1-1 އިން އެއްވަރުވެގެން ވަނީ އިތުރު ވަގުތަށް ގޮސްފައެވެ. ނަމަވެސް އިތުރު ވަގުތުގައި އެއްވެސް ޓީމަކަށް ލަނޑެއް ކާމިޔާބު ނުކުރެވުމުން މެޗު ވަނީ ޕެނަލްޓީ ޝޫޓްއައުޓަކަށް ގޮސްފައެވެ. އަލްހިލާލުން މުބާރާތް ކާމިޔާބު ކުރީ ޕެނަލްޓީ ޝޫޓްއައުޓް 5-4 އިން ކާމިޔާބު ކޮށްގެންނެވެ.
އަލްހިލާލު ކިންގްސް ކަޕު ކާމިޔާބު ކުރުމާއެކު މިއީ މި ސީޒަނުގައި އަލްހިލާލު, އަލްނަސްރު ބަލިކޮށް ތަށްޓެއް ހާސިލުކުރި ދެވަނަ ފަހަރެވެ. ސައުދީ ޕްރޯ ލީގުގައި ވެސް އަލްހިލާލު ވަނީ އަލްނަސްރު މައްޗަށް ކުރި ހޯދާފައެވެ.
