ޗެމްޕިއަންސް ލީގުގެ ފައިނަލުގައި ޑޯޓްމަންޑާއި ރެއާލް މެޑްރިޑު ވާދަކުރާ ފޯރިގަދް ފައިނަލު މިރޭ ކުޅޭނެެއެވެ.
ޗެމްޕިއަންސް ލީގުގެ ފައިނަލަށް މި ދެ ޓީމުން ނިކުންނައިރު, މިއީ މި މުބާރާތުގައި ދެ ޓީމުން ވާދަކުރާ 15 ވަނަ ފަހަރެވެ.
ޑޯޓްމަންޑް, ރެއާލްއާ ދެކޮޅަށް ޗެމްޕިއަންސް ލީގުގައި ވާދަކުރި 14 ފަހަރުގެ ތެރެއިން މޮޅުވެވިފައިވަނީ އެންމެ 3 ފަހަރެވެ. ޑޯޓްމަންޑުގެ ޗެމްޕިއަންސް ލީގު ތާރީހުގައި އެންމެ ގިނައިން ވާދަކޮށްފައިވާ ޓީމަކީ ވެސް ރެއާލް މެޑްރިޑްކަން ފާހަގަކޮށްލަން ޖެހެއެވެ.
ރެއާލް މެޑްރިޑް އެ ޓީމުގެ 15 ވަނަ ޗެމްޕިއަންސް ލީގު ހާސިލުކުރުމުގެ އުއްމީދުގައި މިރޭ ނިކުންނައިރު ފާހަގަކޮށްލަން ޖެހޭ ކަމަކީ އެ ޓީމު އޮތީ ވަރުގަދަ ފޯމެއްގައި ކަމެވެ. ދާދި ފަހުން ރެއާލުން އެ ޓީމުގެ 36 ވަނަ ލަލީގާ ކާމިޔާބު ކޮށްފައިވާ އިރު, އެންމެ ފަހުން ރެއާލް ކުޅުނު 25 މެޗުގައި އެ ޓީމު ބަލިވެފައެއް ނެތެވެ. މި ވަރުގަދަ ފޯމާއި, ޗެމްޕިއަންސް ލީގުގައި ރެއާލުގެ ތާރީހުގެ ސަބަބުން މި ފައިނަލަށް ރެއާލު ނިކުންނަނީ "ފެވަރިޓްސް" ގެ ގޮތުގައެވެ.
"އަންޑާޑޯގްސް" ގެ ގޮތުގައި ޗެމްޕިއަންސް ލީގުގެ ފައިނަލަށް ނިކުންނަ ޑޯޓްމަންޑަށް ބަލާލާއިރު އެ ޓީމުގެ ފޯމު އޮތީ އެހާ ރަނގަޅަކަށް ނޫނެވެ. ބުންޑަސްލީގާގެ ސީޒަން ނިމުނުއިރު ޑޯޓްމަންޑަށް ސީޒަން ނިންމާލެވުނީ ތާވަލުގެ ފަސްވަނައިގައެވެ. ނަމަވެސް ޑޯޓްމަންޑުގެ ޓީމު ޗެމްޕިއަންސް ލީގުގައި މި ސީޒަނުގައި ދައްކަމުން އައިސްފައިވަނީ ތަފާތު ކުޅުމެކެވެ. އެޓްލެޓިކޯ މެޑްރިޑާއި ވަރުގަދަ ޕީއެސްޖީ ކަޓުވާލައި, ފައިނަލުގެ ޖާގަ ކަށަވަރުކުރި ޑޯޓްމަންޑަށް މި ޖާދޫވީ ޔޫސީއެލް ކެމްޕެއިން ފުރިހަމަ ކުރަން އޮތީ އެންމެ މެޗެކެވެ.
ރެއާލް މެޑްރިޑާއި ޑޯޓްމަންޑު ވާދަކުރާ ފޯރިގަދަ ޗެމްޕިއަންސް ލީގުގެ ފައިނަލް އޮތީ އިނގިރޭސި ވިލާތުގެ ވެމްބްލީ ސްޓޭޑިއަމްގައެވެ. މި ދެ ޓީމުން ބައްދަލުކުރާ މެޗު ފެށުމަށް ހަމަޖެހިފައިވަނީ މިރޭ 00:00 ގައެވެ.
