ބާސެލޯނާ އާއި ރެއާލް މެޑްރިޑަށް އެންމެ ރަނގަޅު ގޮތަކީ ސުޕާލީގު އުފައްދަން މަސައްކަތް ނުކޮށް ޔޫރަޕިއަން ކްލަބް އެސޯސިއޭޝަން (އީސީއޭ) އާ އަލުން ގުޅުން ކަމަށް އެ އެސޯސިއޭޝަނަގް ޗެއާމަން ނާސިރް އަލްހެލައިފީ ބުނެފިއެވެ.
ސުޕާލީގަކީ 2021 ވަނަ އަހަރު ރެއާލް މެޑްރިޑުގެ ރައީސް ފްލޮރެންޓީނޯ ޕެރޭޒް އެންމެ ކުރީ ސަފުގައި ހުރެގެން އުފައްދަން އުޅުނު އާ މުބާރާތަކެވެ. މި މުބާރާތް އެންމެ ފުރަތަމަ އިއުލާނު ކުރި އިރު ދުނިޔޭގެ އެންމެ ބޮޑު 12 ޓީމުން ވަނީ އީސީއޭ ދޫކޮށް ސުޕާލީގުގައި ބައިވެރިވާން އެއްބަސްވެފައެވެ. ނަމަވެސް ސުޕާލީގުގެ ސަބަބުން ފުޓުބޯޅައަށް ކުރާނެ ނޭދެވޭ އަސަރުގެ ސަބަބުން އެ ކްލަބުތަކުގެ ސަޕޯޓަރުން ވަނީ ސުޕާލީގުން ވަކިވުމަށް ވެރިންނަށް ގޮވާލައިފައެވެ.
ސަޕޯޓަރުންގެ ނިންމުމަށް އިހްތިރާމް ކުރުމުގެ ގޮތުން 10 ކްލަބަކުން ސުޕާލީގު ދޫކޮށް އީސީއޭއާ އަލުން ގުޅުނު ކަމުގައިވިއަސް ބާސެލޯނާ އަދި ރެއާލް މެޑްރިޑް އަންނަނީ އަދިވެސް ސުޕާލީގު ކުރިއަށް ގެންދިއުމަށް މަސައްކަތް ކުރަމުންނެވެ. އެހެންކަމުން އަލްހެލައިފީ ވަނީ, ސަޕޯޓަރުންގެ އަޑު އަހާ އަލުން އީސީއޭއާ ގުޅުމަށް ބާސާއަށާއި ރެއާލަށް ގޮވާލައިފައެވެ.
"އަހަންނަކަށް ނޭންގެ ކިހިނެއް ކަމެއް އެންމެ ދެ ޓީމު އޮންނަ އިރު ލީގެއް ކުޅޭނީ. އެއީ ސަޕޯޓަރުން ބޭނުންވާނެ ގޮތެއް ނޫން. ރެއާލަކީ ޗެމްޕިއަންސް ލީގުގަ ނުލާހިކު ކާމިޔާބު ޓީމެއް. ޗެމްޕިއަންސް ލީގު އުވާލައި, އާ މުބާރާތެއް އުފައްދަން މަސައްކަތް ކުރުމަށްވުރެ މާ ރަނގަޅު ވާނެ އީސީއޭއާ ގުޅުން. އަހަރެމެނަށް ވެސް އަދި އެ ދެ ކްލަބަށް ވެސް އެންމެ ރަނގަޅުވާނީ އެ ގޮތް" ސުޕާލީގާ ބެހޭ ގޮތުން ވާހަކަދައްކަމުން އަލްހެލައިފީ ބުންޏެވެ.
އަލްހެލައިފީ ރެއާލުގެ ރައީސް ފްލޮރެންޓީނޯ ޕެރޭޒްއަށް އެނބުރި އީސީއޭއާ ގުޅުމަށް ގޮވާލި ކަމުގައިވިއަސް, ޕެރޭޒް އީސީއޭއާ ގުޅުމަށް އެއްބަސްވާނެ ކަމަށް ލަފައެއް ނުކުރެވެއެވެ. އެމްބާޕޭގެ ޓްރާންސްފާގެ ސަބަބުން އަލްހެލައިފީ އާއި ޕެރޭޒްގެ މެދުގައި މައްސަލަ ހޫނުވެފައިވާ ވަގުތެއްގައި އަލްހެލައިފީގެ އެދުމަށް, ސުޕާލީގު ދޫކޮށް އީސީއޭއާ ގުޅުމަށް ޕެރޭޒް އެއްބަސްވުމަކީ ނާދިރުކަމެކެވެ.
