ދިވެހި ގައުމިއްޔަތު މަޝްރޫއުގެ ވިލަރެސްވެރީންނަށް އަމާޒުކޮށް، ނޫސްވެރިކަމުގެ ކުރު ތަމްރީނު ޕްރޮގްރާމެއް ފަށައިފިއެވެ.
މައުލޫމާތު ލިބިފައިވާ ގޮތުގައި މި ކޯހުގައި ކިޔަވައިދެއްވާނީނޫސްވެރިކަމުގައި 25 އަހަރަށްވުރެ ގިނަ ދުވަހު ހިދުމަތް ކުރައްވައި، ނޫސްވެރިކަން ނުވަތަ ލިޔުންތެރިކަމުގެ ރޮނގުން ފައުމީ އިނާމު ލިބިވަޑައިގެންފައިވާ ބޭފުޅުންނެވެ.
އެ ބޭފުޅުންނަކީ:
- "ވީމިއާ" ގެ ކުރީގެ އެޑިޓަރު އިމާދު ލަތީފު
- ގައުމީ އަރުޝީފުގެ ޑިރެކްޓަރު ޖެނެރަލް މުހައްމަދު އާމިރު (ބަހުގެ އުސްތާޒެއް)
- "އަދިވެސް އޮންލައިން"ގެ ސީ.އީ.އޯ އެޑިޓަރު މުހައްމަދު ޝަހީބާ ("ހަވީރު" ނޫހުގެ ކުރީގެ އެޑިޓަރު)
- "ދައުރު" ގެ ޗީފް އެޑިޓަރު މޫސާ ލަތީފު ("ހަވީރު"ގެ ކުރީގެ ޗީފް އެޑިޓަރު)
- "ސަން މީޑިއާ" ގެ ސީއީއޯ މުހައްމަދު އާސިފު (މޮންދު) (ވީމީޑިއާގެ ކުރީގެ ސީއީއޯ)
- "ވަން" ގެ ސީއީއޯ އަދި ޗީފް އެޑިޓަރު ސިނާން އަލީ ("ސަން" ގެ ކުރީގެ ޗީފް އެޑިޓަރު)
މީގެއިތުރުން މި ތަމްރީނު ޕްރޮގްރާމްގައި ނޫސްވެރިކަމުގެ އަހހުލާގާ ބެހޭ ގޮތުންނާއި ކާމިޔާބު ނޫސްވެރިއަކަށް ވުމުގެ އަޒުމާއި ހިތްވަރުގެ މައްޗަށާއި ތަރުޖަމާ ކުރުމުގެ ފަންނުގެ މައްޗަށާއި ނޫސްވެރިކަމުގެ ބަހުގެ ހަމައިގެ މައްޗަށާއި ނިއުސްރޫމް މެނޭޖްމަންޓުގެ މައްޗަށާއި ފޮޓޯ އަދި ވީޑިއޯ ޖާނަލިޒަމްގެ މައްޗަށާއި މީޑިއާގެ ތަފާތު ވައްތަރުތަކުގެ މައްޗަށާއި ފޭކް ނިއުސްގެ މައްޗަށްވެސް ބައްލަވާނެ ކަމަށްވެސް މައުލޫމާތު ލިބިފައިވެއެވެ.
އަދި މި ކޯހުގައި ކިޔަވައިދޭ މައިގަނޑު ބައިތަކުގެ ތެރޭގައި ހަބަރު ދެނެގަންނާނެ ގޮތާއި، ހަބަރު އެކުލަވައިލައި ލިޔާނެ ގޮތާއި، އިންޓަވިއު ކުރާނެ ގޮތާއި ފީޗާ ރިޕޯޓް ލިޔާނެ ގޮތްތައް ހިމެނެއެވެ.
ދިވެހި ބަހާއި ސަގާފަތާއި ތަރިކައާ ބެހޭ ވުޒާރާގައި ކުރިއަށް ގެންދާ މި ކޯސް ކުރިއަށް ދާނީ މި މަހުގެ 2 އިން 12 ގެ ނިޔަލަށެވެ.
