އިންޓަނެޓު މެދުވެރިކޮށް ހިންގަމުންދާ ކުށްތަކާއި ބެހޭގޮތުން މައުލޫމާތު ދިނުމަށް އދ.އަތޮޅުގައި ޕްރޮގްރާމެއް ފަށައިފިއެވެ.
އދ އަތޮޅުގެ ފުލުހުންނާއި ސަިބާ ސެންޓާރާއި ގުޅިގެން މި ޕްރޮގްރާމް ކުރިއަށްދާނީ ޖޫން 2 އަކުން ފެށިގެން ޖޫން 7ގެ ނިޔަލަށެވެ. މި ޕްރޮގްރާމު ކުރިއަށްދާނީ މަހިބަދޫ، މާމިގިލި، ދަނގެތި، ދިގުރަށް ، އޮމަދޫ އަދި ފެންފުށީގައެވެ. މި ޕްރޮގުރާމުގައި އިންޓަނެޓް މެދުވެރިކޮށް ހިންގާ ކުށްތަކާއި އެފަދަ ކުށްތަކުން ރައްކާތެރިވާނެ ގޮތުގެ މައުލޫމާތުދޭނެއެވެ. އަދި އިންޓަނެޓު މެދުވެރިކޮށް ގަނާކުރުމާއި އެކަމުގެ ޝިކާރައަށްވާ މީހުންނަށް އެކަމުގެ ސަބަބުން ކުރިމަތިވާނެ ގެއްލުންތަކާ ގުޅޭގޮތުން މައުލޫމާތުދޭނެއެވެ. އަދި އެފަދަ ކަންކަމުން ރައްކާތެރިވުމަށް އެޅިދާނެ ފިޔަވަޅުތަކާ ގުޅޭގޮތުން ވެސް މައުލޫމާތު ހިއްސާކުރާނެއެވެ.
މީގެއިތުރުން މިހާރު ރާއްޖޭގައި އާއްމު ކަމަކަށް ވެފައިވާ އިންޓަނެޓް ބޭނުންކޮށްގެން ކުރިއަށް ގެންދާ ފައިސާގެ ސްކޭމް ތަކާއި ބެހޭގޮތުން ވެސް މި ޕްރޮގުރާޟުގައި މައުލޫމާތު ދޭނެއެވެ. އަދި ފޯނު ކޯލުތަކުން ރައްކާތެރިވުމަަށާއި އެކަންކަމުން ރައްކާތެރިވެތިބުމަށް ކުރެވިދާނެ ކަންކަމާ ގުޅޭގޮތުން މައުލޫމާތުދިނުމަށް ހަމަޖެހިފައިވެއެވެ. އަދި އޮޅުވާލައިގެން ފައިސާ ހޯދުމުގައި ބޭނުންކުރަމުންގެންދާ އެންމެ ފަހުގެ އުކުޅުތަކާއި އެފަދަ ކަންކަމުން ރައްކާތެރިވާނެ ގޮތްތަކުގެ މައުލޫމާތު ހިއްސާކުރާނެއެވެ.
