ފްރާންސްގެ ސުޕާސްޓާ ކިލިއަން އެމްބާޕޭ ރަސްމީކޮށް ރެއާލް މެޑްރިޑަށް ސޮއިކޮށްފިއެވެ.
އެމްބާޕޭ ރެއާލަށް ސޮއިކުރިކަން ހާމަކުރީ އިޓަލީގެ އިތުބާރުހުރި ޖާނަލިސްޓު ފަބްރީޒިއޯ ރޮމާނޯއެވެ. ފަބްރީޒިއޯ އިންސްޓަގްރާމްގައި އާއްމުކުރި ޕޯސްޓުގައި ވަނީ އެމްބާޕޭ ރެއާލް މެޑްރިޑަށް ސޮއިކުރިކަން ޔަގީން ކޮށްދީފައެވެ. ފަބްރީޒިއޯ ހާމަކުރި ގޮތުގައި ކުރިއަށް އޮތް ހަފްތާގައި ރެއާލުން, އެމްބާޕޭ އެ ކްލަބުގެ ކުޅުންތެރިއެއް ގޮތުގައި އިއުލާނު ކުރާނެއެވެ.
ފަބްރީޒިއޯގެ ޕޯސްޓުގައި ހާމަކުރި ގޮތުގައި ރެއާލް މެޑްރިޑަށް ސޮއިކުރުމަށް އެމްބާޕޭ ވަނީ މި އަހަރުގެ ފެބްރުއަރީ މަހު ނިންމާފައެވެ. ރަސްމީކޮށް ސޮއިކުރިކަން އިއުލާނުކުރަން މިހާ ގިނަ ދުވަހު މަޑު ކުރީ ރެއާލް މެޑްރިޑުން ސީޒަނުގެ ފަހު މެޗު ކުޅެން ދެން ކަމަށް ފަބްރީޒިއޯ ވަނީ ބުނެފައެވެ.
ފްރާންސްއަށް ނިސްބަތްވާ އެމްބާޕޭ އެންމެ ފުރަތަމަ ފުޓުބޯޅަ ދުނިޔެއަށް އޭނާގެ ހުނަރުތައް ދައްކާލީ އޭއެސް މޮނަކޯގައެވެ. މޮނަކޯގައި އެމްބާޕޭ ދެއްކި މޮޅު ކުޅުމުގެ ސަބަބުން ޕީއެސްޖީ ވަނީ 2017 ވަނަ އަހަރު ލޯނު އެއްބަސްވުމެއްގެ މަތިން އޭނާގެ ސޮއި ހޯދާފައެވެ. އޭގެ ފަހުން 2018 ވަނަ އަހަރު ޕީއެސްޖީ ވަނީ 180 މިލިއަން ޔޫރޯގެ އަދަދަކަށް އެމްބާޕޭ ދިގު މުއްދަތުގެ ކޮންޓްރެކްޓެއްގެ މަތިން ގަނެފައެވެ.
ޕީއެސްޖީގައި އެމްބާޕޭ ހޭދަކުރި ހަތް އަހަރުގައި އޭނާ ވަނީ އެ ކްލަބަށް 305 މެޗު ކުޅެދީ 328 ލަނޑު ކާމިޔާބު ކޮށްދީފައެވެ. އެމްބާޕޭއަކީ ޕީއެސްޖީއަށް އެންމެ ގިނަ ލަނޑު ކާމިޔާބު ކޮށްފައިވާ ކުޅުންތެރިޔާކަން ވެސް ފާހަގަކޮށްލަން ޖެހެއެވެ.
