ރެއާލް މެޑްރިޑަށް ސޮއި ކުރުމަކީ އޭނާއަށް ލިބުން ފަހުރެއް ކަމަށް ކިލިއަން އެމްބާޕޭ ބުނެފިއެވެ.
އެމްބާޕޭ މިހެން ބުނެފައިވަނީ, ރެއާލް މެޑްރިޑުން ރަސްމީކޮށް އޭނާ އެ ކްލަބުގެ ކުޅުންތެރިޔެއް ގޮތުގައި އިއުލާނުކުރި ފަހުން "އެކްސް" ގައި ކުރި ޕޯސްޓެއްގައެވެ.
"މިއަދު އަހަރެންގެ ހުވަފެނެއް ހަގީގަތަކަށް ވެއްޖެ. ރެއާލް މެޑްރިޑު ތަމްސީލު ކުރުމުގެ ފުރުސަތު ލިބުމަކީ އަހަންނަށް ލިބުނު ބޮޑު ފަހުރެއް. އެއްވެސް މީހަކަށް އަންދާޒާ ވެސް ނުކޮށްލެވޭނެ އަހަރެން ކިހާ އުފާވެފަކަން މި ހުރީ. ރެއާލްގެ ސަޕޯޓަރުންގެ ފަރާތުން ލިބުނު އެއްބާރުލުމަށް ވަރަށް ބޮޑަށް ޝުކުރު އަދާ ކުރަން" އެކްސްގައި ކުރި ޕޯސްޓުގައި އެމްބާޕޭ ބުންޏެވެ.
އެމްބާޕޭ ވަނީ މެއި މަހުގެ 10 ވަނަ ދުވަހު އޭނާ އޭރު ކުޅެމުންދިޔަ ކްލަބު ކަމުގައިވާ ޕީއެސްޖީ ދޫކޮށްލާނެ ކަން އިއުލާނުކޮށްފައެވެ. ޕީއެސްޖީ ދޫކޮށްލާނެ ކަމަށް އޭނާ އިއުލާނު ކުރުމާއެކު އެތައް ފަރާތްތަކުން ވަނީ އޭނާ ރެއާލަށް ސޮއިކުރާނެ ކަމަށް ލަފާ ކޮށްފައެވެ.
އެމްބާޕޭ, ޕީއެސްޖީއާއެކު ހަދާފައިވާ ކޮންޓްރެކްޓް ހަމަވާނީ ޖޫން 30 ވަނަ ދުވަހުގައި ކަމަށް ވާތީ, އޭނާ ރެއާލް މެޑްރިޑުގެ ޓީމާ ގުޅޭނީ ޖުލައި މަހުގެ 1 ވަނަ ދުވަހުއެވެ.
