ޔޫރޯއަށް ތައްޔާރު ވުމުގެ ގޮތުން ފިންލޭންޑާ ދެކޮޅަށް ކުޅުނު އެކުވެރިކަމުގެ މެޗު 4-2 އިން ފަސޭހަކަމަށްއެކު ޕޯޗުގަލް ކާމިޔާބު ކޮށްފިއެވެ.
ޕޯޗުގަލްގެ ދަނޑެއް ކަމުގައިވާ އެސްޓާޑިއޯ ހޯސޭ އަލްވަލާޑޭގައި ކުޅުނު މެޗަށް ޕޯޗުގަލް ނިކުތީ އެ ޓީމުގެ ސުޕާސްޓާ އަދި ކެޕްޓަން ކްރިސްޓިއާނޯ ރޮނަލްޑޯ ސްކޮޑުގައި ނުހިމަނައެވެ. ރޮނަލްޑޯގެ ބަދަލުގައި ޕޯޗުގަލްއިން ނިކުތީ ލިވަޕޫލުގެ ޑިއޯގޯ ޖޯޓާ ކުރިއަށް ލައިގެންނެވެ.
ރޭގެ މެޗުގައި ޕޯޗުގަލްގެ ފަރާތުން ފެނިގެންދިޔައީ ވަރުގަދަ ކުޅުމެކެވެ. އެގޮތުން އެ ޓީމުން ވަނީ މެޗުގެ 17 ވަނަ މިނެޓުގައި ލަނޑު ޖަހާ ލީޑު ނަގާފައެވެ. މި ލަނޑު އެ ޓީމަށް ކާމިޔާބު ކޮށްދިނީ ރުބެން ޑިއާސްއެވެ. ފުރަތަމަ ހާފުގެ އިތުރު ވަގުތުގައި ލިބުނު ޕެނަލްޓީއެއް ކާމިޔާބު ކޮށް, ޑިއޯގޯ ޖޮޓާ ވަނީ އެ ޓީމުގެ ލީޑު ދެ ގޯލަށް އިތުރުކޮށްފައެވެ. ޖޮޓާގެ ގޯލާއެކު ފުރަތަމަ ހާފު ނިމުނީ 2-0 އިންނެވެ.
ދެވަނަ ހާފުގެ 55 ވަނަ މިނެޓުގައި ބްރޫނޯ ފާނަންޑޭޒް ވަނީ ލަނޑު ޖަހާ ޕޯޗުގަލްގެ ލީޑު ތިން ގޯލަށް އިތުރުކޮށްފައެވެ. މެޗުގެ 72 ވަނަ މިނެޓުގައި ފިންލޭންޑްގެ ހުނަރުވެރި ސްޓަރައިކަރު ޓީމޫ ޕޫކީ ވަނީ ލަނޑު ޖަހާ އެ ޓީމަށް ސުން ކަނޑާލަދީފައެވެ. އޭގެ ދެ މިނެޓު ފަހުން ޕޫކީ ވަނީ އޭނާގެ ދެވަނަ ލަނޑު ޖަހާ ޕޯޗުގަލްގެ ލީޑު އެންމެ ގޯލަކަށް ކުޑަކޮށްފައެވެ.
ޕޫކީގެ ދެ ގޯލުން ފިންލޭންޑަށް ހިތްވަރެއް ލިބިގެންދިޔަ ކަމުގައިވިއަސް މެޗުގެ 85 ވަނަ މިނެޓުގައި ފާނަންޑޭޒް ވަނީ ޕޯޗުގަލްގެ ހަތަރު ވަނަ ލަނޑު ކާމިޔާބު ކޮށް, ފިންލޭންޑް އަތް ނުފޯރާ ހަމައަށް ނަތީޖާ ޖައްސާލާފައެވެ.
ޔޫރޯގެ އެންމެ ފަހުގެ ތައްޔާރީތައް ވަމުންދާ ޕޯޗުގަލް ދެން ނިކުންނާނީ ކްރޮއޭޝިއާއާ ދެކޮޅަށެވެ. މި އެކުވެރިކަމުގެ މެޗު ތާވަލު ކޮށްފައިވަނީ 8 ޖޫން ވާ ހޮނިހިރު ދުވަހަށެވެ.
