އެޕަލް އިން ސީރީއަށް ޗެޓްޖީޕީޓީ އިންޓަގްރޭޓް ކޮއްފައިވާތީ ޗެޓްޖީޕީޓީ މަނާކޮށްފައިވާ ޗައިނާގެ މާކެޓަށް އަލަށް ތައާރަފުކުރާ އައިފޯނު ވިއްކުން އެކުންފުންޔަށް ވަނީ ވަރަށް ބޮޑު އުނދަގުލަކަށްވެފައެވެ.
އެޕަލް އިން "އެޕަލް އިންޓެލިޖެންސް" ގެ ފީޗާތައް ދައްކާލާފައިވާއިރު، ޗެޓްޖީޕީޓީ ބޭނުންކުރުމަށް އޯޕަންއޭއައިއާ އެކު ހަދާފައިވާ އެއްބަސްވުމަށް އަލިއަޅުވާލާފައިވެއެވެ. ނަމަވެސް ޗައިނާގެ ހަރުކަށި އޭއައި ގަވައިދުތަކުގެ ސަބަބުން ލޯކަލް އެޕްރޫވަލް ހޯދަން ޖެހޭ އިރު، ޗައިނާގައި އެޕަލްގެ ޕްލޭންތައް ތަންފީޒުކުރަން ވަނީ ވަރަށް ބޮޑަށް ދަތިވެފައެވެ.
ސެޕްޓެމްބަރު މަހު އައިފޯން ލޯންޗް ކުރުމުގެ ކުރިން ލޯކަލް އޭއައި ޕާޓްނަރެއް ހޯދަން މަސައްކަތް ކުރި ނަމަވެސް އެޕަލް މިހާތަނަށް އޮތީ އެއްބަސްވުމެއް ނެތިއެވެ. ޤައުމިއްޔަތާއި، އިޤްތިޞާދީ ގޮންޖެހުންތަކާއި، ޚާއްޞަކޮށް ހުވާވޭގެ ވާދަވެރިކަން އިތުރުވުމުގެ ސަބަބުން ޗައިނާގައި މިއަހަރު ފުރަތަމަ ކުއާޓަރުގެ އެޕަލްގެ ސްމާޓްފޯން ވިއްކާ މިންވަރު ވަނީ 10 ޕަސެންޓް ދަށަށް ގޮސްފައެވެ.
މިފަދަ މައްސަލައެއް އެޕަލްއަށްވަނީ އީޔޫ މާކެޓުގައިވެސް ޖެހިފައެވެ. ޑިޖިޓަލް މާކެޓްސް އެކްޓްގެ ސަބަބުން އެޕަލް އަށް ލަސްތަކެއް ކުރިމަތިވެ، އޭއައި ފީޗާ ރޯލްއައުޓްތައް ޔޫރޮޕުގައި ވަނީ ހުއްޓުމަކަށް އައިސްފައެވެ.
"ޑިޖިޓަލް މާކެޓްސް އެކްޓް (ޑީއެމްއޭ) ގެ ސަބަބުން އުފެދިފައިވާ ރެގިއުލޭޓަރީ ނުތަނަވަސްކަމުގެ ސަބަބުން، ތިން ފީޗާއެއް ކަމަށްވާ އައިފޯން މިރަރިން، ޝެއާޕްލޭ ސްކްރީން ޝެއާރިން އެންހޭންސްމަންޓްސް އަދި އެޕަލް އިންޓެލިޖެންސް މި އަހަރު އީޔޫގައި ދިރިއުޅޭ އެޕަލް ކަސްޓަމަރުންނަށް ތައާރަފް ކުރެވޭނެ ކަމަކަށް ގަބޫލެއް ނުކުރަން،" އެޕަލްގެ ތަރުޖަމާނަކު ވިދާޅުވިއެވެ.
އިންޑަސްޓްރީގެ ތަޖުރިބާކާރުން ގަބޫލުކުރާ ގޮތުގައި އެޕަލް އިން ވަރަށް އަވަހަށް ޗައިނާގެ ލޯކަލް އޭއައި ޕާޓްނަރެއް ކަށަވަރުކުރާނެއެވެ. މިއީ ޗައިނާގެ ކަސްޓަމަރުންގެ އުންމީދުތައް ހާސިލްކުރުމަށާއި އެޕަލްގެ ދެވަނައަށް އެންމެބޮޑު މާކެޓުގައި އެކުންފުނީގެ ނުފޫޒު ދަމަހައްޓަން މުހިންމު ފިޔަވަޅެކެވެ،
