ރައީސުލްޖުމްހޫރިއްޔާ ޑރ.މުހައްމަދު މުއިއްޒު އިންޑިއާއަށް ކުރެއްވި ދަތުރުފުޅުގައި މިލިޔަނަކަށްވުރެ ގިނަ ރުފިޔާ ހޭދަވެފައިވާ ކަމަށް ސަރުކާރުން މިއަދު މައުލޫމާތު ދެއްވަައިފިއެވެ.
މި މަހު އަށްވަނަ ރައީސް އިންޑިއާއަށް ވަޑައިގަތީ އެގައުމުގެ ޕްރައިމް މިނިސްޓާރ ނަރެންދްރާ މޯދީ އައު ދައުރަކަށް ހުވާ ކުރުމުގެ ޖަލްސާގައި ބައިވެރި ވުމުގެ ގޮތުންނެވެ. ރައީސް އޮފީހުން މިއަދު ބުނީ، އެ ދަތުރުފުޅުގައި ރައީސް މުއިއްޒުގެ ވަފުދުގައި ހިމެނިގެން އަދި ސަޕޯޓު ސްޓާފުންގެ ގޮތުގައި ޖުމުލަ 20 ބޭފުޅުން އިންޑިއާއަށް ދަތުރުކުރެއްވި ކަމަށެވެ.
އެ ދަތުރަށް ސަރުކާރުން ވަނީ 1،440،170.33 ރުފިޔާ ޚަރަދުކޮށްފައެވެ.
ރައީސްގެ އިންޑިއާ ދަތުރުފުޅުގައި ހާސިލުކުރެވުނު މުހިންމު ކަމެއްގެ ގޮތުގައި ދެ ގައުމުގެ ޒަމާންވީ ގުޅުން އިތުރަށް ބަދަހިކުރުމާ ގުޅޭ ގޮތުން މަޝްވަރާ ކުރެވުނުކަން ރައީސް އޮފީހުން ވަނީ ފާހަގަ ކުރައްވާފައެވެ.
