ރައްޔިތުންނާ ގާތުން ހިދުމަތްދީ ހޭލުންތެރިކޮށް މައުލޫމާތު ދިނުމަށް ފުލުހުން ކުރަމުންދާ މަސައްކަތްތަކުގެ ތެރެއިން، ވ. ފުލިދޫގައި ސައިބަރ ސޭފްޓީ އެވެއާނަސް ސަރވޭއެއް ކުރިއަށް ގެންގޮސްފިއެވެ.
ފުލުހުން ބުނީ މި މަހުގެ 25 އިން 29 އަށް، ފުލިދޫގައި މަސައްކަތްކުރާ ފުލުހުން ކުރިއަށް ގެންދިޔަ މި ސަރވޭގައި، ސައިބަރ ސޭފްޓީއަށް ހޭލުންތެރިވެފައިވާ މިންވަރު ދެނެގަނެ އެފަދަ ކަމެއް ދިމާވެއްޖެނަމަ ކަންކުރަންވީގޮތް އެނގިފައިވާ މިންވަރު އޮޅުންފިލުވާފައިދީ އަދި އެފަދަ ކަމެއް ދިމާވެއްޖެނަމަ އަމަލުކުރަންވީ އެންމެ ރަނގަޅު ގޮތްތައް ރައްޔިތުންނަށް ބުނެދީފައިވާނެ ކަމަށެވެ.
އަދި ސައިބަރ ކްރައިމްގެ މައްސަލަތަކުން ސަލާމަތްވެ ތިބުމަށް ކުރެވިދާނެ ކަންކަމާ ގުޅޭގޮތުން މައުލޫމާތު ހިއްސާކޮށްފައިވެއެވެ. ފުލިދޫގެ ރައްޔިތުންގެ ފަރާތުން މި ސަރވޭއަށް ވަރަށް ބޮޑު އެއްބާރުލުމެއް ލިބިފައިވާ ކަމަށްވެސް ފުލުހުން ބުންޏެވެ.
މި ސަރވޭގައި ފުލިދޫގައި މީހުން ދިރިއުޅޭ 33 ގެއަކަށް ޒިޔާރަތްކޮށް މައުލޫމާތު ހިއްސާކޮށްފައިވެއެވެ.
ފުލުހުން ބުނީ ކުށްމަދު އަމާން ވެއްޓެއް ގާއިމުކުރުމުގެ ގޮތުން އަތޮޅުތަކުގައި މަސައްކަތްކުރާ ފުލުހުން ދަނީ ސިލްސިލާކޮށް މިފަދަ ޕްރޮގްރާމްތައް ހިންގަމުންދާ ކަމަށާއި މިފަދަ ޕްރޮގްރާމުތަކަކީ ވަރަށް ކާމިޔާބު ހަރަކާތްތަކެއްގެ ގޮތުގައި ފާހަގަކުރެވިފައިވާ ކަމަށެވެ.
