ނިމިދިޔަ ސަރުކާރުގެ މާލީ ވަޒީރު އިބްރާހިމް އަމީރު ދައުލަތުގެ މާލީ ހާލަތާއި ގުޅުވައިގެން ދައްކާފައިވާ ޒިންމާދާރުކަން ކުޑަ ވާހަކަތަކާއި ގުޅިގެން، މާލީ ވުޒާރާއިން ހިތާމަ ކުރާކަން އެފަރާތުން ހާމަކޮށްފިއެވެ.

މާލީ އެވުޒާރާއިން މިހެން ބުނެފައިވަނީ، ހަގީގަތް އޮޅޭގޮތަށް ކުރީގެ މާލީ ވަޒީރު ދައްކާފައިވާ ވާހަކަތައް ރައްޔިތުންނަށް އޮޅުންފިލުވައި ދިނުމުގެ ގޮތުން އެ ވުޒާރާއިން ނެރުނު ނޫސްބަޔާނެއްގައެވެ.

މާލީ ވުޒާރާގެ ނޫސްބަޔާނުގައި ވަނީ، ޒިންމާދާރު ކަމާއެކު ޚަރަދުތައް ކުޑަ ކުރުމުގެ އެއްވެސް މަސައްކަތެއް ކުރީ ސަރުކާރުން ކޮށްފައި ނުވުމުގެ ސަބަބުން، ދައުލަތުގެ ޚަރަދުތައް އާމްދަނީއާ ނުބައްދަލު މިންވަރަށް އިތުރުވެ ޑެފިސެޓް ފޫބެއްދުމަށް ކޮންމެ އަހަރަކުވެސް ނަގަންޖެހޭ ދަރަނީގެ ޢަދަދު އިތުރުވެގެން ގޮސްފައިވާ ކަމަށެވެ. އަދި ފިޗުން ރާއްޖޭގެ ކްރެޑިޓް ރޭޓިންގ ދަށްކުރީވެސް އޭގެ ސަބަބުން ކަމަށް މާލީ ވުޒާރާގެ ނޫސްބަޔާނުގައި ހާމަކޮށްފައި ވެއެވެ.

ކުރީ ސަރުކާރުގެ އިހްމާލުން ގައުމުގެ ހާލަތު ދަށްވެފައި ވީނަމަވެސް އެކަންކަން އިސްލާހު ކުރުމަށް މާލީ ވުޒާރާއިން މިހާރު ދަނީ ގިނަ މަސައްކަތްތަކެއް ކުރަމުންނެވެ. އެ މަސައްކަތަކީ މަސައްލަހަތު ހިމެނޭ، އަދި މުސްތަގުބަލާ ގުޅޭ ކަމަކަށްވާތީ، އެ މަސައްކަތްތަކުގައި ހުރިހާ ފަރާތްތަކުންވެސް ފުރިހަމަ އެއްބާރުލުން ދިނުމަށް އެ ވުޒާރާއިން އެދިލައްވައެވެ.

އިތުރު ލިޔުންތައް