ފަލަސްތީނުގެ މުޖާހިދުންދިން ރޮކެޓް ހަމަލާތަކަކާ ގުޅިގެން ޒަޔަނިސްޓު އިސްރާއީލުގެ އަސްކަރިއްޔާއިން ޣައްޒާގެ ދެކުނުގައި އޮންނަ ޚާން ޔުނިސްގެ އިރުމަތީގެ ބޮޑު ސަރަހައްދެއް ހުސްކުރުމުގެ އަމުރެއް ނެރެފިއެވެ.
އެންމެ ފުރަތަމަ އޯޑިއޯ މެސެޖުތައް މެދުވެރިކޮށް ދިން މި އިންޒާރަށްފަހު އަރަބި ބަހުން ސޯޝަލް މީޑިއާގައި ޝެއާކުރުމުން ގިނަ ބަޔަކު ވަނީ އެ ސަރަހައްދު ދޫކޮށް ގޮސްފައެވެ. ޒަޔަނިސްޓު އިސްރާއީލާ ދިމާލަށް ގާތްގަނޑަކަށް 20 ވަރަކަށް ރޮކެޓް ފޮނުވާލާފައިވާއިރު، މިއީ ފާއިތުވި މަސްތަކުގައި މިފަދަ އެންމެ ވަރުގަދަ ހަމަލާއެވެ. ގިނަ ރޮކެޓްތައް ހުއްޓުވާފައި ނުވަތަ މީހުން ދިރިނޫޅޭ ސަރަހައްދުތަކަށް ވެއްޓިފައިވުމުގު ސަބަބުން އެއްވެސް މީހަކަށް ގެއްލުމެއް ލިބިފައެއް ނުވެއެވެ. އިސްރާއީލުގެ އަމަލުތަކަށް ބަދަލު ހިފުމުގެ ގޮތުން ފަލަސްތީނު އިސްލާމިކް ޖިހާދު (ޕީއައިޖޭ) އިން ވަނީ ރޮކެޓް ހަމަލާގެ ޒިންމާ އުފުލާފައެވެ.
މީހުން ހުސަކުރަން ބުނި ސަރަހައްދުތަކު ތެރޭގައި ޔޫރަޕިއަން ހޮސްޕިޓަލްއާއި ވަށައިގެންވާ ސަރަހައްދު ހިމެނެއެވެ. އެހެންކަމުން އެތައްސަތޭކަ ބަލިމީހުންނާ ވަނީ ހޮސްޕިޓަލުން ނުކުންނަން ޖެހިފައެވެ. މުހިންމު އިކުއިޕްމަންޓުތަކާއި މުވައްޒަފުން ޚާން ޔުނިސްގެ ނާސިރު ހޮސްޕިޓަލަށް ބަދަލުކުރުމުގެ މަސައްކަތްވެސް ދަނީ ކުރަމުންނެވެ.
މީގެ އިތުރުން ޚާން ޔުނިސްގެ އިރުމަތީ ސަރަހައްދުގެ ގެއަކަށް ޒަޔަނިސްޓު އިސްރާއީލުގެ އަސްކަރިއްޔާއިން ދިން ބޮމުގެ ހަމަލާތަކުގައި އެކަކު މަރުވެ ހަ މީހަކު ޒަހަމްވެފައިވާ ކަމަށް ރިޕޯޓްތައް ބުނެއެވެ.
ޣައްޒާގެ އިންސާނީ ޙާލަތު އަދިވެސް ގޯސްވެފައިވާއިރު، ޒަރޫރީ ބޭނުންތަކަށް ބޭނުންވާ ސާމާނާއި ޚިދުމަތުގެ ދަތިކަން ވަނީ ވަރަށް ބޮޑަށް ކުރިމަތިވެފައެވެ. އދ. ގެ އޮފިޝަލުން ވަނީ ޣައްޒާގެ 2.2 މިލިއަން މީހުންގެ ޙާލަތު ވަރަށް ބޮޑަށް ގޯސްވެފައިވާކަމަށް ވިދާޅުވެ، ހަމަނުޖެހުންތައް އިތުރުވަމުންދާ ދަނޑިވަޅެއްގައި ފެނާއި ޞިއްޙީ ޚިދުމަތާއި ތެލުގެ މުހިންމުކަން ފާހަގަކުރައްވާފައެވެ.
ޣައްޒާގެ އުތުރުގައި އޮންނަ ޝެޖައްޔާގައި މިހާރުވެސް ވަރުގަދަ ކުރިމަތިލުންތަކެއް ދަނީ ހިނގަމުންނެވެ. ޣައްޒާގެ ޞިއްޙަތާބެހޭ ވުޒާރާއިން ހާމަކޮށްފައިވާ ގޮތުގައި ހަމަނުޖެހުންތައް ފެށުނު ފަހުން މިހާތަނަށް 37،900 އަށްވުރެ ގިނަ މީހުން ޝަހީދުވެފައިވާއިރު ފާއިތުވި ދުވަހު 23 މީހަކު ވަނީ ޝަހީދުވެފައެވެ.
