ޖަރުމަނުގައި މިހާރު ކުރިއަށްދާ ޔޫރޯ ފުޓްބޯޅަ މުބާރާތުގެ ދެވަނަ ބުރުގައި ރޮމޭނިއާ އަތުން 3-0 އިން މޮޅުވެ ނެދަލޭންޑްސް މުބާރާތުގެ ކުއާޓާ ފައިނަލަށް މިރޭ ދަތުރު ކޮށްފިއެވެ.
އެލިއަންޒް އެރީނާގައި ކުޅުނު މެޗުގައި ނެދަލޭންޑްސް ގެ ފަރާތުން ފެނިގެންގޮސްފައިވަނީ ވަރުގަދަ ކުޅުމެކެވެ. އެ ގޮތުން މެޗު ފެށިގެން 20 ވަނަ މިނެޓުގައި އެ ޓީމުން ވަނީ ލަނޑު ޖަހާ މެޗުގެ ލީޑު ނަގާފައެވެ. މި ލަނޑު އެ ޓީމަށް ކާމިޔާބު ކޮށްދިނީ, ލިވަޕޫލަށް ކުޅެމުން އަންނަ ކޯޑީ ގަކްޕޯއެވެ. ގަކްޕޯގެ މި ގޯލާއެކު ފުރަތަމަ ހާފު ނިމުނީ 1-0 އިން ނެދަލޭންޑްސް ކުރީގައި އޮވެގެންނެވެ.
ދެވަނަ ހާފުގައި ނެދަލޭންޑްސް ވަނީ އެ ޓީމުގެ ކުޅުން އިތުރަށް ވަރުގަދަކޮށް, ރޮމޭނިއާގެ ގޯލަށް އިތުރަށް ނުރައްކާ ކޮށްފައެވެ. އެ ގޮތުން މެޗުގެ 64 ވަނަ މިނެޓުގައި ގަކްޕޯ ވަނީ ލަނޑު ޖަހާ ނެދަލޭންޑްސްގެ ލީޑު ދެ ގޯލަށް އިތުރު ކޮށްފައެވެ. ނަމަވެސް ގަކްޕޯ ލަނޑު ޖެހި އިރު ހުރީ އޮފްސައިޑުގައި ކަމަށް ވާތީ, ރެފްރީ ވަނީ ލަނޑު ސައްހަ ނޫންކަމަށް ނިންމާފައެވެ.
މެޗުގައި ނެދަލޭންސްގެ ދެވަނަ ލަނޑު ފެނިގެންދިޔައީ 83 ވަނަ މިނެޓުގައެވެ. މި ލަނޑަކީ, މެޗުގައި މޮޅު ކުޅުމެއް ދައްކާފައިވާ ގަކްޕޯ ފަހިކޮށްދިން ފުރުސަތަކުން ޑޮންޔަލް މަލެން ކާމިޔާބު ކުރި ލަނޑެކެވެ. އޭގެ އަށް މިނެޓު ފަހުން މަލެން ވަނީ އޭނާގެ ދެވަނަ ލަނޑު ކާމިޔާބު ކޮށް, 3-0 އިން ފަސޭހަކަމާއެކު ނެދަލޭންޑްސްއަށް މެޗު ކާމިޔާބު ކޮށްދީފައެވެ.
މި ނޮކްއައުޓް މެޗުން ބަލިވުމާއެކު ރޮމޭނިއާއަށް ވަނީ މުބާރާތަށް އަލްވަދާއު ކިޔަން ޖެހިފައެވެ. މުބާރާތުން ކެޓިއަސް, އެ ޓީމުގެ ފަރާތުން މި ޔޫރޯގައި ފެނިގެންގޮސްފައިވާ ހިތްވަރާއި ނުގުޑާ އަޒުމަށް ގިނަ ބަޔެއްގެ ތައުރީފު އެ ޓީމަށް ވަނީ ލިބިފައެވެ.
ރޮމޭނިއާ ކަޓުވާލައި ކުއާޓާ ފައިނަލުން ޖާގަ ހޯދި ނެދަލޭންޑްސް ކުއާޓާގައި ނިކުންނާނީ މިރޭ 00:00 ގައި އޮސްޓްރިއާ އަދި ތުރުކީ ބައްދަލު ކުރާ މެޗުން މޮޅުވާ ޓީމަކާ ދެކޮޅަށެވެ.
