އިންފާރު ނުރާނައި އޮތް ދެ ގޯއްޗެއްގައި މާބޮޑަށް ވިނަހެދި އަދި ވައުވުމުގެ ސަބަބުން އަވަށްޓެރިންނަށް އުނދަގޫވާތީ ދެ ގޯތި ސާފުކުރުމަށް ތިނަދޫ ސިޓީ ކައުންސިލުން ހަތް ދުވަހުގެ މުހުލަތެއް ދީފިއެވެ.
ތިނަދޫ ސިޓީ ކައުންސިލުން އިއްޔެ ނެރެފައިވާ އިއުލާނެއްގައި ބުނީ މި ދެ ގޯއްޗަކީ ސާފު ނުކޮށް ވަރަށް ގިނަ ދުވަސްވެފައިވާ ދެ ގޯތިކަން އެކައުންސިލަށް ފާހަގަ ކުރެވިފައިވާ ކަމަށެވެ. އަދި ދެ ގޯތި ވަރަށް ބޮޑަށް ވައުވެފައި އޮތުމުގެ ސަބަބުން އަވަށްޓެރިންގެ ފަރާތުން ކެނޑިނޭޅި އެކައުންސިލަށް ޝަކުވާ ލިބެމުން އަންނަ ކަމަށްވެސް މި އިއުލާނުގައި ބުނެފައިވެއެވެ.
ތިނަދޫ ސިޓީ ކައުންސިލުން ވިނަ ނޮޅައި ސާފުކުރަން އެންގި ދެ ގޯއްޗަކީ "އިިވްނިންގްސަން" އާއި "ރާޑޯއާގެ" ނަމަކަށް ކިޔުނު ދެ ގޯއްޗެވެ. އިއްޔެއިން ފެށިގެން 7 ދުވަހުގެ ތެރޭގައި ގޯތި ސާފުނުކޮށް އަދި އިންފާރު ވަކިނުކޮށްފިނަމަ ގޯތި އަތުލާނެކަމުގެ އިންޒާރު ތިނަދޫ ސިޓީ ކައުންސިލުން ވަނީ މި ދެ ގޯތީގެ ވެރިންނަށް ދީފައެވެ.
ތިނަދޫ ސިޓީ ކައުންސިލުން ދެ ގޯއްޗެއް ސާފުކޮށް، އިންފާރު ވަކިކުރުމަށް އެންގިއިރު، ރާއްޖޭގެ އެކި ރަށްރަށުގައި ދިރިއުޅެން ދޫކޮށްފައިވާ ބަންޑާރަ ގޯތިތައް ވައުވެ، އަވަށްޓެރިންނަށް އުނދަގޫވާކަމުގެ ޝަކުވާތައް ކައުންސިލްތަކުން ކޮންމެ ދުވަހަކުހެން ލިބެއެވެ.
