ގައުމީ ޔުނިވާސިޓީއިން ކުރިއަށް ގެންދާ އަރަބި ބަހުގެ ކްރޭޝް ކޯހުގައި ބައިވެރިވުމުގެ ފުުރުސަތު ހުޅުވާލައިފިއެވެ.
ގައުމީ ޔުނިވާސިޓީއިން މައުލޫމާތު ދޭ ގޮތުގައި މި ކޯސް ކުރިއަށް ދާނީ ދެ ގޮތަކަށެވެ. އެއީ, ކްލާހަށް ހާޒިރުވެގެން (ފޭސްޓުފޭސް) އަދި އޮންލައިން ކޮށެވެ. ކްލާހަށް ހާޒިރުވެގެން ކިޔަވާ ފަރާތްތަކަށް ކްލާސް ބޭއްވުމަށް ހަމަޖެހިފައިވަނީ ގަައުމީ ޔުނިވާސިޓީގެ މާލެ ކެމްޕަސްގައެވެ.
100 ފަރާތަކަށް މި ކޯހުގައި ބައިވެރިވެވޭއިރު, އޭގެ ތެރެއިން 70 ޖާގަ ކްލާހަށް ހާޒިރުވެގެން ކިޔަވަން ބޭނުންވާ ފަރާތްތަކަށް ހާއްސަ ކުރެވިފައިވާ އިރު, އޮންލައިންކޮށް ކިޔަވަން ބޭނުންވާ ފަރާތްތަކަށް ލިބިގެންދަނީ 30 ޖާގައެވެ.
ގައުމީ ޔުނިވާސިޓީއިން ގެންދާ މި ކޯހަކީ 16 އަހަރުން މަތީގެ ބޭފުޅުންނަށް ހާއްސަ ކުރެވިފައިވާ ކޯހެކެވެ. އެ ޔުނިވާސިޓީއިން ހާމަކުރާ ގޮތުގައި މި ކޯސް ފުރިހަމަ ކުރާ ފަރާތްތަކަށް, އަރަބި ބަހުގެ މަތީ ފެންވަރުގެ ކޯސްތަކުގައި ބައިވެރިވުމުގެ ފުރުސަތު ފަހިވެގެން ދާނެއެވެ.
މި ކޯހުގައި ބައިވެރިވުމުގެ ސުންގަޑިއަކީ އޮގަސްޓު މަހުގެ 3 ވަނަ ދުވަހެވެ. ކޯހާ ބެހޭ އިތުރު މައުލޫމާތު ބޭނުންފުޅުވާނަމަ ގައުމީ ޔުނިވާސިޓީގެ އީމެއިލް މެދުވެރިކޮށް މައުލޫމާތު ސާފު ކުރެއްވުމަށް އެ ޔުނިވާސިޓީއިން ވަނީ އެދިފައެވެ.
