އެމެރިކާއާއެކު ވިޔަފާރީގެ ގުޅުންތައް ޤާއިމުކުރެވޭނެ ދާއިރާތަކާ ގުޅޭގޮތުން މަޝްވަރާކުރެއްވުމަށް، ރާއްޖޭގެ އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު އެމެރިކާއަށް މިއަދު ދަތުރުފުޅެއް ފަށްޓަވައިފިއެވެ.
އިޤްތިޞާދާ ބެހޭ ވުޒާރާއިން ހާމަކުރެއްވި ގޮތުގައި ވަޒީރު ސައީދުގެ މިދަތުރުފުޅުގައި އެމެރިކާގެ އިޤްތިޞާދީ ދާއިރާގެ އިސް ބޭފުޅުންނާ ބައްދަލު ކުރައްވައި ވިޔަފާރީގެ އިންވެސްޓްމަންޓައް ހޯއްދެވުމަށް ފުޅާދާއިރާއެއްގައި މަޝްވަރާ ކުރައްވާނެއެވެ. އަދި އެމެރިކާގެ ވިޔަފާރިވެރިންގެ މައި ޖަމްޢިއްޔާ "ޗެމްބަރ އޮފް ކޮމަރސް"ގެ އިސް ބޭފުޅުންނާވެސް ވަޒީރު ސައީދު ބައްދަލު ކުރައްވާނެކަމަށް އިޤްތިޞާދީ ވުޒާރާއިން ހާމަ ކުރެއްވިއެވެ.
ވަޒީރު ސައީދުގެ މިދަތުރުފުޅުގައި އެންމެ އިސްކަމެއް ދެއްވައިގެން މަޝްވަރާ ކުރެއްވުމަށް ހަމަޖެހިފައިވާ އެއްކަމަކީ ރާއްޖޭގެ ފުޅާ ދާއިރާއެއްގައި އީ-ވޮލެޓުގެ ހިދުމަތް ދިނުމަށްޓަކައި ޕޭޕަލްގެ ޚިދުމަތް ބޭނުން ކުރުމުގައި ހުރި ގޮންޖެހުންތައް ހައްލު ކުރުމާ ގުޅޭ ގޮތުންނެވެ. މިކަމާ ގުޅޭ ގޮތުން އެމެރިކާ ސަރުކާރާއެކު މަޝްވަރާތަކެއް ކުރުމަށް ހަމަޖެހިފައިވާކަމަށް އިޤުތިޞާދީ ސަޢީދު ވަނީ މިދިޔަ މެއިމަހު ވިދާޅުވެފައެވެ.
ޕޭޕެލްއަކީ އޮންލައިންކޮށް ފައިސާ ފޮނުވާ ލިބިގަތުމަށް ބޭނުން ކުރާ އީ-ވޮލެޓެކެވެ. ރާއްޖޭގައި ޕޭޕަލް ބޭނުން ކުރެވެނީ ހަމައެކަނި ރާއްޖެއިން ބޭރަށް ފައިސާ ފޮނުވުމަށެވެ. އީ-ވޮލެޓް ތައާރަފް ކުރައްވައި އޭގެ ބޭނުން ދިވެހިންނަށް ހިފޭނެ ގޮތް ހެއްދެވުމަކީ މިދިޔަ ރިޔާސީ އިންތިހާބުގައި ރައީސް ޑޮކްޓަރ މުހިއްމު މުއިއްޒު ވެވަޑައިގެންނެވި ވައުދެކެވެ.
