މިފަހަރުގެ ޔޫރޯ ފުޓްބޯޅަ މުބާރާތުގައި ފްރާންސުން ކުޅެނީ ފޫހި ފުޓްބޯޅައެއް ކަމަށް ދެކެވޭ ވާހަކަތަކަށް ސްޕެއިނުގެ ކޯޗް ލުއިސް ޑި ލަ ފައުންޓޭ ރައްދު ދީފިއެވެ.
ޔޫރޯ ސެމީފައިނަލުގައި މިރޭ ސްޕެއިނާއި ފްރާންސް ބައްދަލު ކުރަން ހަމަޖެހިފައިވާ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ނޫސްވެރިންގެ ސުވާލުތަކަށް ޖަވާބު ދެމުން ފުއެންޓޭ ބުނީ މިމުބާރާތުގައި ފްރާންސުން ކުޅެނީ "ފޫހި" ކުޅުމެއް ކަމަށް ބުނެ ދައްކާ ވާހަކަތަކަށް އެއްބަސްވެވެން ނެތް ކަމަށެވެ.
"ފްރާންސުން ކުޅެނީ ކޮންމެ ހާލެއްގައިވެސް މޮޅުވާން" ފްރާންސުން ކުޅެނީ ފޫހި ފުޓްބޯޅައެއް ކަމަށް ކަމަށް ދެކެވޭ ވާހަކަތަކަށް ރައްދު ދެމުން ސްޕެއިން ކޯޗް ފުއެންޓޭ ބުންޏެވެ.
ފްރާންސަށް މިފަހަރު ސެމީފައިނަލުން ޖާގަ ލިބިފައި ވީނަމަވެސް މުބާރާތުގައި އެޓީމަށް އޯޕަން ޕްލޭގައި އެންމެ ލަނޑެއްވެސް ޖެހިފައެއް ނުވެއެވެ. ޖުމްލަ 3 ލަނޑު ޖެހުނުއިރު އޭގެ ތެރެއިން ދެލަނޑަކީ އިދިކޮޅު ކުޅުންތެރިން އަތުން ބައިކޮޅަށް ވަން ދެލަނޑެވެ. އަނެއް ލަނޑު ކެޕްޓަން ކިލިއަން އެމްބައްޕޭ ޖެހީ ޕެނަލްޓީއަކުންނެވެ.
ފްރާންސާ ހިލާފަށް ފުއެންޓޭގެ އިރުޝާދުގެ ދަށުން ސްޕެއިނުން ދަނީ މިމުބާރާތުގައި ބަލާހިތްވާފަދަ ރީތި މޮޅު އެޓޭކިންގ ގޭމެއް ކުޅެމުންނެވެ. ފުއެންޓޭ ބުނީ ސްޕެއިނާއި ފްރާންސް ބައްދަލު ކުރާ މެޗް ވެގެންދާނީ ސަޕޯޓަރުން ބަލާހިތްވާފަދަ މޮޅު މެޗަކަށް ވެގެންދާނެ ކަމަށެވެ.
ސްޕެއިނާއި ފްރާންސް ބައްދަލު ކުރާ ސެމީފައިނަލް މެޗް ފަށާނީ ރާއްޖޭ ގަޑިން މިރޭ ދަންވަރު 12:00 ގައެވެ.
