ހަރުކަށި ފިޔަވަޅެއްގެ ގޮތުން، ނޭޝަނަލް ސެމްސަންގް އިލެކްޓްރޯނިކްސް ޔޫނިއަން (އެންއެސްއީޔޫ) އިން އެ ޔޫނިއަންގެ 30،000 މެމްބަރުންނަށް މުއްދަތެއް ނެތް ހަޅުތާލެއް ފެށުމަށް ގޮވާލައިފިއެވެ.
މި އިޢުލާނު ކުރެވުނީ 3 ދުވަހުގެ އާންމު ހަޅުތާލަކަށްފަހު، އެ މުއްދަތުގައި ރަނގަޅު މުސާރައަކާއި ޢިނާޔަތްތަކަކަށް މަޝްވަރާކުރުމަށް މެނޭޖްމަންޓުން އެއްވެސް ޝައުޤުވެރިކަމެއް ނުދައްކާކަމަށް ޔޫނިއަނުން ބުނުމަށްފަހުގައެވެ.
ދެކުނު ކޮރެއާގައި ސެމްސަންގް އިލެކްޓްރޯނިކްސްގެ މުވައްޒަފުންގެ ގާތްގަނޑަކަށް ހަތަރުބައިކުޅަ އެއްބައި ތަމްސީލުކުރާ އެންއެސްއީޔޫ އިން މިހާރު ވަނީ 6،500 އެއްހާ މުވައްޒަފުން މި މަސައްކަތު ހުއްޓުވުމުގައި ބައިވެރިވެފައިވާކަމަށް ބުނެފައެވެ.
ސެމްސަންގް އިލެކްޓްރޯނިކްސްއިން ވަނީ އުފެއްދުންތެރިކަމަށް ބުރޫއަރާފައިވާކަމަށް ޔޫނިއަނުން ދައްކާ ވާހަކަތަކާމެދު ދެބަސްވެ، ކުންފުނިން ހެޔޮ ނިޔަތުގައި މަޝްވަރާކުރުމަށާއި އުފެއްދުންތެރިކަން ކުރިއަށް ގެންދިއުމަށް މަސައްކަތްކުރާނެކަމަށް ބުނެފައެވެ. ނަމަވެސް ޔޫނިއަނުން ދަނީ ހަރުކަށިކޮށް، ޖުލައި 10 ވަނަ ދުވަހުން ފެށިގެން ދެވަނަ މުއްދަތެއް ނެތް ހަޅުތާލެއް ފަށާނެކަމަށް އިޢުލާނުކޮށްފައެވެ. ހޯމަ ދުވަހު ބޭއްވުނު އިހުތިޖާޖެއްގައި ގާތްގަނޑަކަށް 3،000 މީހުން ބައިވެރިވިއެވެ.
މި ހަޅުތާލަކީ ދުނިޔޭގެ އެންމެ އިސް މެމޮރީ ޗިޕްސް، ސްމާޓްފޯނު އަދި ޓީވީ އުފައްދާ ފަރާތްކަމުގައިވާ ސެމްސަންގް އިލެކްޓްރޯނިކްސްއަށް ވަރަށް މުހިންމު ވަގުތެކެވެ. އާންމުކޮށް ޔޫނިއަން އުފެއްދުމާ ދެކޮޅަށް ހުންނަ ސެމްސަންގްގެ ސިޔާސަތު ބަދަލުވީ 2020 ގައި، އާންމުންގެ ފާޑުކިޔުންތަކާއި ކުންފުނީގެ ޗެއަރމަނާ ގުޅުންހުރި ޤާނޫނީ މައްސަލަތަކާ ހެދިއެވެ.
ހަމަނުޖެހުންތަކާ އެކުވެސް ސެމްސަންގްގެ ހިއްސާތަކަށް ބަދަލެއްނާދެއެވެ. އެއީ އޭއައި ޓެކްނޮލޮޖީގެ ޑިމާންޑްތައް އިތުރުވުމުގެ ސަބަބުން ލިބޭނެ ކަމަށް އަންދާޒާ ކުރި ފައިދާ އިތުރުވުމުން ކަމަށް އެނަލިސްޓުން ބުނެއެވެ. އެ ކުންފުނީގެ ދެވަނަ ކުއާޓަރުގެ އަންދާޒާގައި ވަނީ މިދިޔަ އަހަރާ އަޅާބަލާއިރު ފައިދާ 15 ގުނަ އިތުރުވާނެ ކަމަށް ލަފާކޮށްފައެވެ.
