އިންޖީނުގެތަކަށް ބޭނުންވާ ހުރިހާ ސާމާނެއް އެއްތަނަކުން ލިބޭނެ ގޮތަށް ޚާއްޞަ ފިހާރައެއް ހުޅުވުމުގެ މަސައްކަތް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ފަށައިފިއެވެ.
މި ފިހާރައިގެ ޝޯރޫމް ގާއިމުކުރުމަށް ހަމަޖެހިފައިވަނީ ސްޓެލްކޯ އިމާރާތުގެ ތިރީ ބައިގައި މިހާރު ހުރި ފިހާރައާ އިންވެގެން އޮތް ހުސްބިމުގައެވެ.
ސްޓެލްކޯގެ މެނޭޖިންގ ޑިރެކްޓަރު ޙުސައިން ފަހުމީ ވިދާޅުވީ އަލަށް ތަރައްޤީކުރާ ޝޯރޫމްގެ ބޮޑުމިނުގައި 8،000 އަކަފޫޓު ހުންނާނެ ކަމަށާއި، މި މަޝްރޫޢުގެ އަންދާޒާ އަގަކީ 12 މިލިއަން ރުފިޔާ ކަމުގައި ވިދާޅުވިއެވެ. އަދި މި މަޝްރޫޢު ޓެންޑަރ ކުރެވިފައިވާ ކަމަށްވެސް އޭނާ ހާމަކުރެއްވިއެވެ.
ފަހުމީ އިތުރަށް ވިދާޅުވި ގޮތުގައި، މި އައު ޝޯރޫމުން އިންޖީނުގެތަކަށް ބޭނުންވާ އެންމެހައި ސާމާނު ލިބެން ހުންނާނެއެވެ. މީގެ ތެރޭގައި އިންޖީނުތަކާއި، ޓްރާންސްފޯމަރުތަކާއި، އަދި އެހެނިހެން ޓެކްނިކަލް ސާމާނު ހިމެނެއެވެ.
ސްޓެލްކޯގެ މި ފިހާރައަކީ އާންމު ވިޔަފާރިވެރިން ހިންގާ ހާޑްވެއަރ ފިހާރަތަކާ ތަފާތު، ޚާއްޞަ ބޭނުމަކަށް ހުޅުވޭ ތަނެކެވެ. އަދި މަޤްޞަދަކީ ރައްޔިތުންނަށް ފަސޭހަކަމާއެކު ޚިދުމަތް ފޯރުކޮށްދިނުންކަމަށް ފަހުމީ ވިދާޅުވިއެވެ.
މި މަޝްރޫޢު ފުރިހަމަވާނެ ވަކި ތާރީޚެއް ކަނޑައެޅިފައި ނެތްނަމަވެސް، ވަރަށް އަވަހަށް މަސައްކަތް ނިންމައި ޝޯރޫމް ހުޅުވޭނެ ކަމަށް ފަހުމީ އުންމީދު ފާޅުކުރެއްވިއެވެ. އަދި މި މަޝްރޫޢުގެ އެންމެހައި މަސައްކަތްތައް ކުރިއަށް ގެންދާނީ ސްޓެލްކޯގެ އަމިއްލަ މުވައްޒަފުން ކަމުގައިވެސް ފަލުމީ ފާހަަގަކުރިއެވެ.
ފަހުމީ އިތުރަށް ވިދާޅުވީ، އެ ގޮތަށް މަސައްކަތްތައް ކުރަން ނިންމީ އައުޓްސޯސް ނުކޮށް، ކުރާ ހަރަދަކީ ހަމައެކަނި ތަން ހެދުމަށް ގަންނަން ޖެހޭ ސާމާނު ގަތުމަށް ދާ ހަރަދަށް ހެދުމަށެވެ.
ސްޓެލްކޯގެ މުވައްޒަފުން ލައްވައި އެ މަސައްކަތް ކުރުވަނީ އެ މުވައްޒަފުން ވަޒީފާ އިން ވަކި ނުކުރުވުމަށް ކަމަށްވެސް ފަހުމީ ވިދާޅުވިއެވެ.
