އައްޑޫ ސިޓީއަށް ދާއިމީ ގޮތެއްގައި އިންޑިއާގެ ބޯޓު ފަހަރު މެދުވެރިކޮށް ޕެރިޝަބަލް ކާގޯ ގެނައުމާއ،ި ހިތަދޫ ޕޯޓުގެ ޚިދުމަތްތަކާ ގުޅޭގޮތުން އައްޑޫ ސިޓީގެ ބައެއް ވިޔަފާރިވެރިންނާއި ވިޔަފާރި ކުންފުނިތަކުގެ އިސް ފަރާތްތަކާއި އެމްޕީއެލްގެ ސީއީއޯ މުޙައްމަދު ވަޖީހް އަދި މެނޭޖްމަންޓްގެ އިސް ބައެއް ބޭފުޅުން އިއްޔެ ބައްދަލުކުރައްވައިފިއެވެ.
ވިޔަފާތިވެރިންގެ އިތުރުން އައްޑޫ ސިޓީ ކައުންސިލްއާވެސް ސީއީއޯއާއި މެނެޖްމަންޓްއިން މިކަމާ ގުޅޭގޮތުން މަޝްވަރާކުރުމަށް ބައްދަލުކުރައްވާފައިވެއެވެ.
އެމްޕީއެލް އިން ނެރުނު ބަޔާނެއްގައި ވިދާޅުވީ، އައްޑޫ ސިޓީއަށް މި މަހުން ފެށިގެން ޕެރިޝަބަލް ކާގޯ ގެނެވޭނެ އިންތިޒާމް ވަނީ ހަމަޖައްސައިފައި ކަމަށެވެ.
އެމްޕީއެލްއިން ވިދާޅުވީ، މީގެ ކުރިން އައްޑޫއަށް އިންޑިއާގެ ޓުޓިކޮރިންއިން ޕެރިޝަބަލް ކާގޯ ގެންނަނީ ލަކުޑި ބޯޓު ފަހަރުން ކަމަށްވާތ،ީ އެ ބޯޓު ފަހަރުން ދަތުރުކުރެވެނީ އަހަރުގެ ވަކި ދުވަސްތަކެއްގައެވެ. އެހެން ނަމަވެސ،ް އައްޑޫ ސިޓީއަށް ޕެރިޝަބަލް މުދާ ދާއިމީ ގޮތެއްގައި ގެނައުމަށް އެމްޕީއެލް އާއި ހިތަދޫ ޕޯޓުން ކުރި މަސައްކަތުނ،ް އިންޑިއާގެ ފައިނެސް ގުރޫޕު މެދުވެރިކޮށް ޖުލައި މަހުން ފެށިގެން އިންޑިއާގެ ޓުޓިކޮރިން އިން ދަގަނޑު ބޯޓު ފަހަރުގައި ދަތުރުތައް ފަށާނެކަމަށްވެސް އެމްޕީއެލްއިން ވިދާޅުވިއެވެ. އެގޮތުން އަންނަ ފުރަތަމަ ބޯޓު ވަނީ ރޭގެ ވަގުތެއްގައި އައްޑޫއަށް އައިސްފައެވެ.
އައްޑޫގެ ވިޔަފާރިވެރިންނާއި ވިޔަފާރި ކުންފުނިތަކުގެ އިސްވެރިންނާއެކު އިއްޔެ ބޭއްވުނު ބައްދަލުވުމުގައި، ސީއީއޯ ވަޖީހް އިންޑިއާގެ ޓުޓިކޮރިން އިން އައްޑޫއަށް ދާއިމީ ދަތުރުތައް ކުރިއަށް ގެންދިއުމުގައި ވިޔަފާރިވެރިންގެ އެއްބާރުލުމުގެ މުހިންމުކަންވެސް ފާހަގަކުރެއްވިއެވެ. އަދި މި ދަތުރުތައް މެދުނުކެނޑި ކުރިއަށް ގެންދިއުމަށްޓަކައި ވިޔަފާރިވެރިންގެ އެހީތެރިކަމާއި އެއްބާރުލުން ކޮންމެހެން ބޭނުންވާނެ ކަމުގައި އެމަނިކުފާނު ވިދާޅުވިއެވެ.
މި ބައްދަލުވުމުގައި ބައިވެރިވި ބައެއް ވިޔަފާރިވެރިން މުދާ ގެނައުމުގައި މި ވަގުތު އެ ފަރާތްތަކަށް ދިމާވާ ދަތިތައް ހިއްސާކޮށ،ް މިކަން ކުރިއަށް ގެންދެވޭނެ ގޮތްތަކާމެދު އެ ފަރާތްތަކުގެ ހިޔާލުފާޅުކޮށްފައިވާކަމަށްވެސް އެމްޕީއެލް އިން ނެރުނު ބަޔާނުގައި ފާހަގަ ކުރައްވާފައިވެއެވެ.
އެމްޕީއެލްގެ އައު މެނޭޖްމަންޓް ހަވާލުވުމާ ގުޅިގެން، ހިތަދޫ ޕޯޓުގެ ޚިދުމަތްތަކުގައި ފާހަގަކުރެވޭ ކުރިއެރުންތަކެއް އައިސްފައިވާކަމަށް، ޚާއްޞަކޮށް، ޚިދުމަތް ހޯދުމުގައި ލިބިފައިވާ ފަސޭހަކަމާއި، މުވައްޒަފުންގެ ފަރާތުން ލިބެމުންދާ އެއްބާރުލުން ފާހަގަކޮށް، ގިނަ ވިޔަފާރިވެރިން ވަނީ އެކަމަށް ޝުކުރުއަދާކޮއްފައެވެ.
