ފޯރިގަދަ ކުޅުމެއް ފެނިގެންދިޔަ ފައިނަލް މެޗުގައި ކޮލަމްބިއާ 1-0 އިން ބަލިކޮށް އާޖެންޓީނާއިން ކޮޕާ އެމެރިކާ ތަށި ދިފާއު ކޮށްފިއެވެ.
ފައިނަލް މެޗުގައި ފެނިގެންދިޔަ ހަމައެކަނި ލަނޑު 112 ވަނަ މިނެޓުގައި ކާމިޔާބު ކޮށްދިނީ ފޯވާޑް ލައުޓާރޯ މާޓިނޭޒްއެވެ.
އާޖެންޓީނާއިން މިމެޗް ފެށީ ކެޕްޓަން ލިއޮނަލް މެސީ އާއި ވިންގަރ އެންހެން ޑިމާރިއާ ފުރަތަމަ އެގާރައިގައި ހިމަނައިގެންނެވެ. އެކަމަކު ވަރަށް ފިޒިކަލް މެޗެއް ފެނިގެންދިޔަ މިމެޗުގެ 65 ވަނަ މިނެޓުގައި ލިބުނު އަނިޔާއަކާ ގުޅިގެން މެސީ ދަނޑުން ބާލަން ޖެހުނެވެ. މެސީ ދަނޑުން ބާލަން ޖެހުމުން އާޖެންޓީނާގެ ކެޕްޓަން ބޭންޑް އެޅީ ޑިމާރިއާއެވެ. ފައިނަލް މެޗުގެ ކުރިން މިއީ އާޖެންޓީނާގެ ގައުމީ ޖާޒީގައި ކުޅެދޭ އެންމެ ފަހު މެޗުކަން އިއުލާން ކުރި ޑިމާރިއާ ވަނީ ނުަރއްކާތެރި ހަމަލާއެއް ގޯލަށް ފޮނުވާލުމުގެ ކުރިން މިމެޗުގެ އިތުރު ވަގުތުގައި ލަނޑު ޖަހާނެ ރަނުގެ ފުރުސަތެއް ޕެރެޑޭސްއަށް ތަނަވަސް ކޮށްދީފައެވެ.
ރާއްޖޭގެ ގަޑިން ފަތިހު 5 ޖަހާއިރު ފަށަން އޮތް މިމެޗް، ކޮލަމްބިއާގެ އެތައް ސަތޭކަ ސަޕޯޓަރުން ޓިކެޓް ނެތި ދަނޑަށް ވަންނަން މަސައްކަތް ކުރުމުގެ ސަބަބުން ހިނގާދިޔަ ހަމަނުޖެހުންތަކާ ގުޅިގެން ފެށުނީ ރާއްޖޭ ގަޑިން 6 ޖެހިއިރުއެވެ. އާޖެންޓީނާ ޓީމުގެ ކުޅުންތެރިންގެ އާއިލާ މެމްބަރުން ދަނޑަށް ވަނުމަށް މަސައްކަތް ކުރިއިރު ކޮލަމްބިއާގެ ސަޕޯޓަރުން ހުރަސްއަޅާ ބައެއް މަންޒަރުތައްވެސް ފެނިގެން ގޮސްފައިވެއެވެ.
2021 ވަނަ އަހަރުގެ ކޮޕާ އެމެރިކާ އާޖެންޓީނާއިން ކާމިޔާބު ކުރީ ފައިނަލުގައި ބްރެޒިލް 1-0 އިން ބަލިކޮށްފައެވެ. އާޖެންޓީނާއަކީ އެންމެފަހުގެ ވަރލްޑް ކަޕުގެ ޗެމްޕިއަނުންކަންވެސް ފާހަގަ ކޮށްލެވެއެވެ.
