ފިއުލް ސަޕްލައިއާސް މޯލްޑިވްސް (އެފްއެސްއެމް) އިން ގއ. މާމެންދޫ އަދި ގއ. ނިލަންދޫއަށް ވިއްކި ތެޔޮ ހުރީ ފެނާ ގަނޑުބަނޑުކޮށްފައި ކަމަށް ބުނެ މީސްމީޑިއާގައި ފަތުރަމުންދާ ވާހަކަތައް އެ ކުންފުނިން ދޮގުކޮށްފިއެވެ.
މި ދެ ރަށަށް ވިއްކި ތެލުގައި ފެން އެކުލެވޭ ކަމަށް ފެތުރުނު ހަބަރުތަކާ ގުޅިގެން އެފްއެސްއެމް އިން ނެރުނު ބަޔާނެއްގައި ހާމަކުރި ގޮތުގައި އެ ކުންފުނިން ވިއްކާ ތެލަކީ ކޮލިޓީ ރަނގަޅު ތެޔޮކަން ކަށަވަރުކުރުމަށް ޓަކައި ފެނަށް ޓެސްޓު ކުރެވޭ އިންތިޒާމު ހުރިހާ ބާޖެއްގައި އަބަދު ވެސް ހަމަޖެހިފައިވާނެ ކަމަށެވެ.
އޭގެ އިތުރުން އެފްއެސްއެމްއިން ވަނީ, ތެލުގެ ކޮލިޓީ ދެމެހެއްޓުމަށް ޓަކައި ތެޔޮ ވިއްކާ ފަރާތްތަކުން އެ ކަމަށް ހެދިފައިވާ ގަވާއިދުތަކާ އެއްގޮތަށް ތެޔޮ ރައްކާކުރާ އިންތިޒާމުތައް ތަރައްގީ ކުރުމަށް ބާރުއަޅާފައެވެ.
އެފްއެސްއެމްއިން ނެރުނު ބަޔާނުގައި, ތެޔޮ ވިއްކުމުގައި ކަމާބެހޭ ފަރާތްތަކުގެ ލަފައާ އެއްގޮތަށް އަމަލުތައް ބެހެއްޓުމަށް އެ ކުންފުނިން ވަނީ އިލްތިމާސް ކޮށްފައެވެ.
