ދިވެހިރާއްޖޭގެ ބޯޑަރަށް ވަންނަ އުޅަނދުފަހަރު މޮނިޓަރ ކުރުމަށްޓަކައި އެމެރިކާ އާއި ޗައިނާއިން ދެ ޑްރޯން ރާއްޖެއަށް ދޭން ނިންމައިފިކަމަށް މޯލްޑީވްސް ކަސްޓަމްސްގެ ކޮމިޝަނަރ ޖެނެރަލް ޔޫސުފް މާނިޢު މުޙައްމަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ 241 ކޮމިޓީގައި ވާހަކަފުޅު ދައްކަވަމުން މާނިޢު ވިދާޅުވީ، މިވަގުތު ކަސްޓަމްސްގައި ބޯޑަރު ސެކިއުރިޓީ މިނިވަންކަމާއެކު ބެލެހެއްޓުމަށް ބޭނުންވާ ވަސީލަތްތައް ނެތް ކަމަށެވެ. އަދި ރަހުމަތްތެރި ގައުމުތަކުން ވަސީލަތްތައް ހޯދައިގެން ބޯޑަރު ސެކިއުރިޓީ ހަރުދަނާކުރުމަށް ކުރެވޭ މަސައްކަތްތަކުގައި ފާހަގަކުރެވޭ ކުރިއެރުންތަކެއް ލިބިފައިވާ ކަމަށާއި، އެގޮތުން އެމެރިކާ އާއި ޗައިނާގެ ސަރުކާރުން އެއް ޑްރޯން ދޭގޮތަށް ހަމަޖެހިފައިވާ ކަމަށް އޭނާ ވިދާޅުވިއެވެ.
ޑްރޯންތައް ލިބުނު ނަމަވެސް، ބޯޑަރު ބެލެހެއްޓުމުގައި މަސައްކަތްކުރާނީ އެމް.އެން.ޑީ.އެފްއާ ގުޅިގެން ކަމަށްވެސް މާނިޢު ވިދާޅުވިއެވެ.
ކަސްޓަމްސްގެ ޤާބިލިއްޔަތު އިތުރަށް ފުޅާކުރުމުގެ ގޮތުން، ކުރިއަށް އޮތްތާ ބައިނަލްއަޤްވާމީ އެހީތެރިކަން ލިބިގަތުމަށް ހަމަޖެހިފައިވާ ކަމަށްވެސް މާނިޢު ހާމަކުރެއްވިއެވެ. މިގޮތުން، ޖަޕާނު ސަރުކާރުން 85 ފޫޓުގެ އުޅަނދެއް، އަދި ޗައިނާ ސަރުކާރުން ދެ އުޅަނދު ކަސްޓަމްސްއަށް ހަދިޔާ ކުރައްވާނެ ކަމަށް މާނިޢު ވިދާޅުވިއެވެ. މީގެއިތުރުން، އެމެރިކާ ސަރުކާރުން ވެސް އުޅަނދެއް ފޯރުކޮށްދެއްވުމަށް ހަމަޖެހިފައިވާ ކަމަށް މާނިޢު ކޮމިޓީގައި މަޢުލޫމާތު ދެއްވިއެވެ.
ދާދިފަހުން ރާއްޖެއަށް ތުރުކީވިލާތުން ތިން ޑްރޯން ހަދިޔާކޮއްފައިވެއެވެ. މި ޑްރޯންތައް މިހާރު ވަނީ އެމް.އެން.ޑީ.އެފްއާ ހަވާލުކުރެވިފައެވެ.
