ކުޅިވަރު މަޝްރޫޢުތައް ނިންމުމަށް އެކަށީގެންވާ މިންވަރަށް ބަޖެޓުގައި ފައިސާ ހިމަނާފައިނުވާކަމަށާއި ބަޖެޓައް ވުރެ މަޝްރޫޢުތައް ގިނަކަމަށް ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިޢު ވިދާޅުވެއްޖެއެވެ.ވަޒީރު ރާފިޢު މިހެން ވިދާޅުވީ މިއަދުގެ ރައްޔިތުންގެ މަޖިލީހުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބުދާރީވަމުންނެވެ.
ރަށްރަށުގައި ކުޅިވަރު މަޝްރޫޢުތައް ހުއްޓިފައިވާ މައްސަލައާ ގުޅޭގޮތުން މަޖިލީހުގެ މެންބަރުން ކުރެއްވި ސުވާލުތަކަށް ޖަވާބުދެއްވަމުން، ރާފިޢު ވިދާޅުވީ ގިނަ މަޝްރޫޢުތަކެއް ލަސްވެފައިވާ ކަމަށާއި، ލަސްވަނީ ކީއްވެެތޯ ބަލަމުންދާ ކަމަށެވެ.
"ބައެއް ފަހަރު އަޅުގަނޑުމެންގެ ބަޖެޓުގައި ނުހުރޭ ޕްރޮޖެކްޓް ނިންމޭ ވަރަކަށް ފައިސާއެއް. އެހެން ނަމަވެސް ޕްރޮޖެކްޓްތައް އެބަހުރޭ ރަށްރަށުގައި ހަތަރު ޕްރޮޖެކްޓް، ފަސް ޕްރޮޖެކްޓް،" ރާފިޢު ވިދާޅުވިއެވެ.
ރާފިޢު އިތުރަށް ވިދާޅުވި ގޮތުގައި ބަޖެޓުގައި ހިމަނާފައިވަނީ އެޑްވާންސް ފައިސާ ދީގެން މަޝްރޫޢު ފެށޭވަރުގެ އަދަދެކެވެ. މިހެންކަމުން، މަޝްރޫޢުގެ ދެވަނަ ޕޭމަންޓް ނުލިބި މަސައްކަތް ހުއްޓިގެންދާކަމަށް އޭނާ ފާހަގަކުރެއްވިއެވެ.
ކުޅިވަރު ދާއިރާގެ ތަރައްޤީގެ މަޝްރޫޢުތައް ތަންފީޛު ކުރުމަށް އެކަށީގެންވާ ފައިސާ ނެތުމުގެ ގޮންޖެހުމަށް އަލިއަޅުވާލައްވަމުން، ވަޒީރު ފާހަގަކުރެއްވީ ބަޖެޓާ އަޅާބަލާއިރު، ރޭވިފައިވާ މަޝްރޫޢުތަކުގެ އަދަދު މަދުނުކުރެވޭ ކަމެވެ.
އެހެންނަމަވެސް، މަޝްރޫޢުތައް މެދުނުކެނޑި ކުރިއަށް ގެންދިއުމަށްޓަކައި، އަހަރުގެ ފަހުކޮޅުގައި ބައެއް މަޝްރޫޢުތައް ފެށުމަށް ނިންމާފައިވާ ކަމަށް ވަޒީރު ހާމަކުރެއްވިއެވެ. މިގޮތަށް އަހަރުގެ ފަހުކޮޅު މަޝްރޫޢުތައް ފެށުމުން، ޖެހިގެން އަންނަ އަހަރުގެ ބަޖެޓުގައި މަޝްރޫޢުތަކަށް ބޭނުންވާ ބާކީ ފައިސާ ހިމަނައި، މަސައްކަތް މެދުނުކެނޑި ކުރިއަށް ގެންގޮސް މަޝްރޫޢުތައް ނިންމާލެވޭނެ ކަމަށް ވަޒީރު އިތުރަށް ވިދާޅުވިއެވެ.
