އީސުލްޖުމްހޫރިއްޔާގެ ނައިބު، އަލްއުސްތާޛު ހުސައިން މުހައްމަދު ލަތީފް އެމެރިކަން ބާ އެސޯސިއޭޝަން މޯލްޑިވްސް ރޫލް އޮފް ލޯ އިނިޝިއޭޓިވް (އޭ.ބީ.އޭ އެމް.އާރު.އޯ.އެލް.އައި)އާ ބައްދަލުކުރައްވައިފިއެވެ.

މި ބައްދަލުކުރެއްވުން އޮތީ އިއްޔެ ހެނދުނު ރައީސުލްޖުމްހޫރިއްޔާގެ އޮފީހުގައެވެ.

މިބައްދަލުކުރެއްވުމުގައި ރައީސުލްޖުމްހޫރިއްޔާގެ ނައިބު ވަނީ ގައުމުގެ ކުރިއެރުމުގައި ޖަމުޢިއްޔާ ޖަމާޢަތްތަކުން އަދާކުރާ މުހިންމު ދައުރު ފާހަގަކުރައްވައި ޖަމުޢިއްޔާ ޖަމާޢަތްތަކާ ގުޅިގެން ކުރިއަށްދިއުމަށް ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު ވަރަށްބޮޑު އަހައްމިއްޔަތުކަމެއް ދެއްވާކަން ފާހަގަކުރައްވާފައެވެ.

މި ބައްދަލުކުރެއްވުމުގައި އޭ.ބީ.އޭ އެމް.އާރު.އޯ.އެލް.އައިގެ މެންބަރުން ވަނީ 2021 ވަނަ އަހަރު އެ ޖަމުޢިއްޔާ ރާއްޖޭގައި އުފެދުމަށްފަހު އެޖަމުޢިއްޔާއިން ކުރިއަށް ގެންގޮސްފައިވާ ފާހަގަކޮށްލެވޭ މަސައްކަތްތަކަށް އަލިއަޅުވާލާފައެވެ. އެގޮތުން މީހުން ޓްރެފިކްކުރުން ހުއްޓުވުމާއި ކޮރަޕްޝަނާ ދެކޮޅަށް މަސައްކަތްކުރުމާއި މަނީ ލޯންޑަރިން ދެކޮޅަށް މަސައްކަތްކުރުމާއި މާލީކަންކަން ގަވާއިދުތަކާ އެއްގޮތަށް ގެންދިއުމާއި އަދި ރާއްޖޭގައި އުޅޭ ބިދޭސީ އާބާދީއަށް ބޭނުންވާ ސިއްހީ އަދި ގާނޫނީ ހިދުމަތްތައް ލިބިދިނުންފަދަ ބައެއް ނާޒުކު މައްސަލަތައް ހައްލުކުރުމަށް އަމާޒުހިފައިގެން ކުރިޔަށް ގެންދާ ހާއްސަ ޕްރޮގްރާމުތަކުގެ ޒަރީއާއިން ރާއްޖޭގެ މުއައްސަސާތައް ހަރުދަނާކުރުމަށް ގުޅިގެން ކުރެވޭ މަސައްކަތްތަކަށްވެސް އޭ.ބީ.އޭ އެމް.އާރު.އޯ.އެލް.އައިގެ މެންބަރުން މި ބައްދަލުކުރެއްވުމުގައި އަލިއަޅުވާލެއްވިއެވެ. މީގެއިތުރުން އިސްލާހީ ބަދަލުތައް ގެނައުމުގެ ގޮތުން ޝަރުއީ ދާއިރާއާ ގާނޫނު ތަންފީޒުކުރާ ފަރާތްތަކާ ގުޅިގެން ކުރެވޭ މަސައްކަތްތައްވެސް އެބޭފުޅުން ފާހަގަކުރެއްވިއެވެ.

ރާއްޖޭގައި މަސައްކަތްކުރާ ބިދޭސީ މަސައްކަތްތެރިންނަށް ކުރިމަތިވާ ގޮންޖެހުންތައް ހައްލުކޮށްދެއްވުމަށް ސަރުކާރުން ދެއްވާ އިސްކަން ފާހަގަކުރައްވައި އެމަނިކުފާނު ވަނީ ގައުމުގެ ކުރިއެރުމަށްޓަކައި ބިދޭސީ މަސައްކަތްތެރިންގެ ހިއްސާ މުހިންމު ދައުރެއް އަދާކުރާކަން ފާހަގަކުރައްވާފައެވެ. މީގެއިތުރުން ދާދިފަހުން ވަޒީރުންގެ މަޖިލީހުން ނިންމެވި ނިންމެވުންތަކަށް އިޝާރާތްކުރައްވައި ބިދޭސީ މަސައްކަތްތެރިންނަށް

ކުރިމަތިވާ މައްސަލަތައް ހައްލުކުރުމަށް ރައީސުލްޖުމްހޫރިއްޔާ ވަރަށްބޮޑު އިސްކަމެއްދެއްވާކަން ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި ފާހަގަކުރެއްވިއެވެ.

ނައިބު ރައީސްއާ އޭ.ބީ.އޭ އެމް.އާރު.އޯ.އެލް.އައިގެ މެންބަރުން ވަނީ ގުޅިގެން މަސައްކަތްކުރެވިދާނެ ދައިރާތަކާ ގުޅޭގޮތުން ވެސް މި ބައްދަލުކުރެއްވުމުގައި މަޝްވަރާކުރައްވާފައެވެ. މި ބައްދަލުކުރެއްވުން ނިންމަވާލައްވާފައިވަނީ، ގައުމުގެ ކުރިއެރުމަށް މުހިންމު ދާއިރާތަކުގައި ގުޅިގެން މަސައްކަތްކުރުމުގެ އުންމީދުއާ ކުރައްވަމުންނެވެ.

އޭ.ބީ.އޭ އެމް.އާރު.އޯ.އެލް.އައި އަކީ އެމެރިކަން ބާ އެސޯސިއޭޝަން ރޫލް އޮފް ލޯ އިނިޝިއޭޓިވްގެ ދަށުން ރާއްޖޭގައި ރަޖިސްޓަރީކޮށްފައިވާ ޖަމުޢިއްޔާއެކެވެ. އަދި އެއީ އެމެރިކަން ބާ އެސޯސިއޭޝަންގެ ބައިނަލްއަޤްވާމީ ތަރައްގީގެ ޕްރޮގްރާމުގެ ދަށުން އިންޞާފާއި އިޤްތިޞާދީ ފުރުސަތުތަކާ އަދި ޤާނޫނުގެ ވެރިކަން މެދުވެރިކޮށް އިންސާނީ ކަރާމާތް ހިމާޔަތްކޮށް ކުރިއަރުވަން މަސައްކަތްކުރާ ޖަމުއިއްޔާއެއް ވެސް މެއެވެ.

އިތުރު ލިޔުންތައް ރައީސް އޮފީސް