ކަސްޓަމްސްގެ ކޮމިޝަނަރ ޖެނެރަލްގެ މަޤާމުން ވަކިކުރެއްވުމަށްފަހު، ދާޚިލީ ސަލާމަތާ ފަންނިއްޔާތާ ބެހޭ ވުޒާރާގެ ސްޓޭޓް މިނިސްޓަރުގެ މަޤާމަށް ޢައްޔަންކުރެވިފައިވާ ޔޫސުފް މާނިއު މުޙައްމަދު، އެ މަޤާމުން އިސްތިއުފާ ދެއްވައިފިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މާނިއުގެ މަޤާމަށް ބަދަލު ގެންނެވީ މިދިޔަ ހޯމަ ދުވަހުއެވެ. އެ ދުވަހު ރައީސް މުޢިއްޒު ވަނީ ކަސްޓަމްސްގެ ކޮމިޝަނަރ ޖެނެރަލްގެ މަޤާމުން މާނިއު ވަކިކުރެއްވުމަށްފަހު، އެ މަޤާމަށް ފުރަތަމަ ފަހަރަށް އަންހެން ބޭފުޅަކު ޢައްޔަންކުރައްވާފައެވެ. އެ މަޤާމު މުހާރު އަދާކުރައްވަނީ ޅ. ހިންނަވަރު ސަންދުރަ، ފާޠިމަތު ދިޔާނާއެވެ.
ސްޓޭޓް މިނިސްޓަރުގެ މަޤާމުން މާނިއު އިސްތިއުފާ ދެއްވާފައިވާކަން ދާޚިލީ ސަލާމަތާ ފަންނިއްޔާތާ ބެހޭ ވުޒާރާއިން ވަނީ ކަށަވަރުކޮށްދީފައެވެ. ނަމަވެސް މާނިއު އެ މަޤާމުން އިސްތިއުފާދިން ސަބަބެއް ހާމަކޮށްފައިއެއް ނުވެއެވެ.
