މި އަހަރު ކުރިއަށް ދިޔަ ޔޫރޯގައި އިޓަލީއަށް ތަފާތު ކުޅުމެއް ދެއްކި ޒުވާން ޑިފެންޑަރު, ރިކާޑޯ ކަލަފިއޯރީ އާސެނަލްއަށް ސޮއިކޮށްފިއެވެ.
އިޓަލީގެ އިތުބާރުހުރި ފުޓުބޯޅަ ޖާނަލިސްޓް ފަބްރީޒިއޯ ރޮމާނޯ ވަނީ ސޯޝަލް މީޑިއާއަށް އާއްމު ކުރި ޕޯސްޓެއްގައި ކަލަފިއޯރީ އާސެނަލްއަށް ސޮއިކުރިކަން ޔަގީން ކޮށްދީފައެވެ. ފަބްރީޒިއޯ ހާމަކުރި ގޮތުގައި އާސެނަލް ވަނީ ކަލަފިއޯރީގެ ސޮއި ހޯދުމަށް ޓަކައި އޭނާ ކުރިން ކުޅުން ކްލަބު ކަމުގައިވާ ބޮލޯނާއަށް 50 މިލިއަން ޑޮލަރާ ގާތްކުރާ އަދަދެއްގެ ފީއެއް ދައްކާފައެވެ.
އާސެނަލްއިން ކަލަފިއޯރީއަށް ހުށަހެޅީ ފަސް އަހަރަށް ދިގުދެމިގެންދާ ކޮންޓްރެކްޓެކެވެ. ކަލަފިއޯރީގެ ޓްރާންސްފާގެ އެންމެ ފަހު މަރުހަލާތައް އަވަހަށް ނިންމާލެވިއްޖެ ނަމަ އާސެނަލްގެ ޕްރީ ސީޒަން މެޗުތަކުގައި އޭނާ ފެނިދާނެ ކަމަށް މީޑިއާތަކުން ހާމަކުރެއެވެ.
އުމުރުން 22 އަހަރުގެ ކަލަފިއޯރީއަކީ މި ވަގުތު ފުޓުބޯޅަ ދުނިޔޭގައި އެންމެ ބާރަށް އަރަމުން އަންނަ އެއް ޑިފެންޑަރެވެ. މި ދިޔަ ސީޒަނުގައި ތަފާތު ކުޅުމެއް ދެއްކި އިޓަލީގެ ކްލަބެއް ކަމުގައިވާ ބޮލޯނާގައި މޮޅު ކުޅުމެއް ދެއްކުމަށްފަހު, ކަލަފިއޯރީ ވަނީ ދާދި ފަހުން އޮތް ޔޫރޯގައި ވެސް އޭނާގެ ހުނަރުތައް ދައްކާލާފައެވެ.
