އާސެނަލްއަށް ކުޅެމުންދިޔަ އިނގިރޭސި އުއްމީދީ އެޓޭކިންގ މިޑްފީލްޑަރު އެކްލަބު ދޫކޮށް ފުލަމްއަށް ބަދަލުވުމަށް ނިންމައިފިއެވެ.
ފުޓްބޯޅައިގެ ޚަބަރުތައް ގެނެސްދިނުމަށް މަޝްހޫރު ނޫސްވެރިޔާ ފެބްރީޒިއޯ ރޮމާނޯ ހާމަކޮށްފައިވާ ގޮތުން ސްމިތު ރޯ މިހާރު ވަނީ އާސެނަލްގެ ކޭމްޕް ދޫކޮށް ފުލަމްގެ ޓީމާ ގުޅުމަށް ދަތުރު ފަށާފައެވެ. ފުލަމްއަށް ސްމިތު ރޯ، ބަދަލުވަނީ 27 މިލިޔަން ޕައުންޑުގެ ޓްރާންސްފާ ފީ އަކަށް ކަމަށް ފެބްރީޒިއޯ ބުނެއެވެ. އަދި އޭނާގެ ފަރާތުން ކާމިޔާބުތަކެއް ހޯދިއްޖެނަމަ އިތުރު 7 މިލިޔަން ޕައުންޑް އާސެނަލްއަށް ދިނުމަށް ފުލަމްއިން ވަނީ އެއްބަސްވެފައެވެ.
ސްމިތު ރޯ ،24، އަކީ އާސެނަލްގެ ޔޫތު ޓީމުން އުފެއްދި ކުޅުންތެރިއެކެވެ. 2018 ވަނަ އަހަރު ސީނިއަރ ޓީމުން ޖާގަ ހޯދައި އޭނާ ވަނީ އާސެނަލްއަށް 80 މެޗް ކުޅެދީ 12 ލަނޑު ކާމިޔާބު ކޮށްދީފައެވެ.
