އިނގިރޭސި ޕްރިމިއާ ލީގުގެ އާ ސީޒަނަށް ތައްޔާރުވުމުގެ ގޮތުން ކުޅުނު އެކުވެރިކަމުގެ މެޗުގައި އާސެނަލް އަތުން 2-1 އިން މޮޅުވެ, ސްލޮޓާއެކު އާ ފެށުމަކަށް ތައްޔާރުވަމުންދާ ލިވަޕޫލުން ފެންވަރު ދައްކާލައިފިއެވެ.
އެމެރިކާގެ ލިންކަން ފައިނޭންޝަލް ފީލްޑްގައި ކުޅުނު މި މެޗު ލިވަޕޫލުން ފަށާފައިވަނީ ވަރުގަދަކޮށެވެ. އެ ގޮތުން މެޗު ފެށިގެން 13 ވަނަ މިނެޓުގައި އެ ޓީމުން ވަނީ ލަނޑު ޖަހާ މެޗުގެ ލީޑު ނަގާފައެވެ. މި ލަނޑު އެ ޓީމަށް ކާމިޔާބު ކޮށްދިނީ ހުނަރުވެރި ފޯވާޑު މުހައްމަދު ސޮލާހެވެ.
ލިވަޕޫލުގެ ދެވަނަ ލަނޑު ފެނިގެންދިޔައީ މެޗުގެ 34 ވަނަ މިނެޓުގައެވެ. މި ލަނޑަކީ, އާސެނަލްގެ ޑިފެންސް ލައިން މަތިން ހާވީ އެލިއޮޓް ވައްޓާލި ރީތި ޕާހަކުން ފަބިއޯ ކަރަވަޅޯ ކާމިޔާބު ކުރި ލަނޑެކެވެ.
ކަރަވަޅޯ, ލިވަޕޫލުގެ ލީޑު ދެ ގޯލަށް ފުޅާކުރިތާ 6 މިނެޓު ފަހުން އާސެނަލްގެ އުއްމީދީ ފޯވާޑް ކައި ހަވާޓްޒް ވަނީ ލަނޑު ޖަހާ ލިވަޕޫލުގެ ލީޑު އެއް ގޯލަށް ކުޑަކޮށްފައެވެ.
ދެވަނަ ހާފުގައި ދެ ޓީމުންކުރެ އެއް ޓީމަކަށް ވެސް ލަނޑެއް ކާމިޔާބު ނުކުރެވުމާއެކު ލިވަޕޫލު ވަނީ 2-1 އިން މެޗު ކާމިޔާބު ކޮށް, ސްލޮޓުގެ އިރުޝާދުގެ ދަށުން ފެނިގެންދާނެ އާ ފެށުމުގެ ފުރިހަމަ ކުލަތައް ދައްކާލާފައެވެ.
މި ލިބުނު މޮޅާއެކު ލިވަޕޫލު ދެން ނިކުންނާނީ ޕްރީ ސީޒަންގެ ފަހު މެޗުގައި ވާދަވެރި މެންޗެސްޓަރ ޔުނައިޓެޑާ ދެކޮޅަށެވެ. މި މެޗު ކުޅުމަށް ހަމަޖެހިފައިވަނީ 4 އޮގަސްޓު ވާ އާދީއްތަ ދުވަހުއެވެ.
