މިދިޔަ ސަރުކާރުގެ ފަސް އަހަރުގެ ތެރޭގައި ފެނަކައިގެ ދަރަނި އަރާފައިވާ މިންވަރަކީ ޤައުމުގެ އިޤްތިޞާދަށް ބޮޑު ނުރައްކަލެއް ކަމުގައި ދަންނަވަން ޖެހެއެވެ. ނިމިގެންދިޔަ ސަރުކާރުގެ ދައުރު ނިމުނުއިރު ފެނަކައިގެ ދަރަނި އޮތީ 4.6 ބިލިއަން ރުފިޔާގައިކަން ފާހަގަކުރަމެވެ. މިއީ ޙަޤީޤަތުގައި ވެސް ކަންބޮޑުވާންޖެހޭ ވަރުގެ ބޮޑު އަދަދެކެވެ. މި އަދަދަކީ ގާތްގަނޑަކަށް ރާއްޖޭގެ އަހަރެއްގެ ބަޖެޓުގެ ހަތަރުބައިކުޅަ އެއްބަޔާ އެއްވަރުގެ އަދަދެކެވެ.
މި ބޮޑު އަދަދު މިހާ އަވަހަށް އަރާފައިވަނީ ހަމައެކަނި ހިންގުމުގެ ދޯހަޅިކަމުގެ ސަބަބުންނެވެ. މިފަދަ ބޮޑު އަދަދެއް އަރާފައިވަނީ ނާޖާއިޒު ގޮތުގައި ޚަރަދުކޮށް، އަދި ވައްކަންކޮށްގެން ކަމަށް ބެލެވޭކަމަށް ގިނަ ބަޔަކު ދަނީ ތުހުމަތު ކުރައްވަމުންނެވެ. ހިންގުންތެރިކަމެއް ނެތި، އަދި ޒިންމާދާރުކަމެއް ނެތި ކުންފުނި ހިންގުމުގެ ނަތީޖާއެއްގެ ގޮތުން މިފަދަ ބޮޑު ގެއްލުމެއް ވެފައިވާކަން ފާހަގަކުރަމެވެ. މިސާލަކަށް، ފެނަކައިން ބޭނުންވާ ވަރަށްވުރެ ގިނައިން ޖަނަރޭޓަރު ގަނެފައިވާކަމަށް ބެލެވެއެވެ. އަދި މި ޖަނަރޭޓަރުތައް ގަނެފައިވަނީ އާންމުކޮށް ވިއްކާ އަގަށްވުރެ މާ ބޮޑު އަގުގައިކަމަށް ވެސް ބެލެވެއެވެ.މިދިޔަ ސަރުކާރުގެ ފަސް އަހަރުގެ ތެރޭގައި 100 ކުންފުނި ބަނގުރޫޓުވެފައިވާކަމީ މިކަމުގެ ނުރައްކާތެރިކަން ދައްކުވައިދޭ ކަމެކެވެ. މިއީ ހަމައެކަނި ފެނަކައަށް ދިމާވެފައިވާ މައްސަލައެއް ނޫންކަން މީން އެނގެއެވެ. މި ކުންފުނިތަކުގެ ތެރޭގައި ސަރުކާރުގެ ބައެއް ބޮޑެތި ކުންފުނިތައް ވެސް ހިމެނެއެވެ. މިކަމުގެ ސަބަބުން ގިނަ އަދަދެއްގެ މުވައްޒަފުން ވަޒީފާ ގެއްލި، އާއިލާތަކަށް ބޮޑެތި ދަތިތަކާ ކުރިމަތިލާން ޖެހިފައިވެއެވެ. ނަމަވެސް ރައީސް ޑޮކްޓަރ މުހައްމަދު މުޢިއްޒު ގެންދަވަނީ ވިހާވެސް ބޮޑަށް މުވައްޒަފުންނަށް ގެއްލުން ކުޑަވާނެ ގޮތަކީ ކޮބާތޯ ބަލައި އެގޮތް ގޮތަށް ޢަމަލު ކުރަމުންނެވެ.ފެނަކައިގެ މި ބޮޑު ދަރަނީގެ ސަބަބުން ކުންފުންޏަށް އިތުރު ތަރައްޤީގެ މަޝްރޫޢުތައް ހިންގުމަށް ދަތިވެފައިވެއެވެ. މިސާލަކަށް، ރަށްރަށުގައި ފެނާއި ނަރުދަމާގެ ޚިދުމަތް ޤާއިމުކުރުމކުރުމަށް ހުރަސްތަކެއް ކުރިމަތިވެފައިވެއެވެ. އަދި މިހާރު ދެމުންދާ ޚިދުމަތްތަކުގެ ފެންވަރު ދަށްވެ، ޚިދުމަތް ލިބިގަންނަ ފަރާތްތަކުން ޝަކުވާ އިތުރުވެފައިވެއެވެ.
މިދިޔަ ފަސް އަހަރު ފެނަކައިގެ ދަރަނި މިހާ ބޮޑަށް އިތުރުވެފައިވަނީ ހިންގުމުގެ ދޯހަޅިކަމާއި، ނާޖާއިޒު ގޮތުގައި ޚަރަދުކުރުމާއި، އަދި ވައްކަމުގެ ސަބަބުންނެވެ. މިކަމަކީ ވަރަށް ބޮޑަށް ކަންބޮޑުވާންޖެހޭ ކަމެކެވެ. އަދި މިކަމާ ގުޅޭގޮތުން އަވަސް ފިޔަވަޅުތަކެއް އަޅަންޖެހިފައިވާކަން ފާހަގަކުރަމެވެ.މި ޙާލަތުން އަރައިގަތުމަށްޓަކައި، ސަރުކާރުން ގެންދަވަނީ ފިޔަވަޅުތަކެއް އަޅަމުންނެވެ. އެ ގޮތުން ހިންގުންތެރި ޤާބިލް ޓީމެއް މިހާރުވަނީ އެކުލަވާ ލާފައެވެ.
ފެނަކައިގެ މި ބޮޑު ދަރަނި އަދާކުރުމަކީ ފަސޭހަ ކަމަކަށް ނުވާނެއެވެ. ނަމަވެސް، ރަނގަޅު ޕްލޭނަކާއެކު، ޒިންމާދާރު ގޮތެއްގައި މަސައްކަތްކޮށްފިނަމަ، މި ދަތި ޙާލަތުން އަރައިގަނެވޭނެކަން ޔަޤީނެވެ.
