ފިނޭންސް މިނިސްޓަރު ކަމަށް މޫސާ ޒަމީރު، ޚާރިޖީ ވަޒީރު ކަމަށް ޑރ.ޢަބްދުﷲ ޚަލީލް އަދި ސިއްޚީ ވަޒީރު ކަމަށް ޢަބްދުﷲ ނާޡިމަށް ރައްޔިތުންގެ މަޖިލީހުގެ ވަރަށް ތަނަވަސް އަޣްލަބިއްޔަތަކުން މިއަދު ރުހުންދީފިއެވެ.
ރައީސުލް ޖުމްހޫރިއްޔާ ޑރ.މުހައްމަދު މުއިއްޒު މިދިޔަ އަހަރުގެ ނޮވެމްބަރު މަހު ވެެރިކަމާ ހަވާލުވެވަޑައިގެންނެވުމަށްފަހު އެކުލަވާލެއްވި ވަޒީރުންގެ މަޖިލީހުގައި މޫސާ ޒަމީރު ހިމެނިވަޑައިގަތީ ޚާރިޖީ ވަޒީރު ކަމުގައެވެ. ޑރ.ޢަބްދުﷲ ޚަލީލަށް ސިއްޚީ ވުޒާރާ ހަވާލުކުރެއްވިއިރު ނާޡިމް އޭރު އައްޔަން ކުރެއްވީ ރައީސް އޮފީހުގެ މިނިސްޓަރު ކަމުގެ މަގާމަށެވެ.
ވަޒީރުންގެ މަޖިލީހަށް ރައީސުލް ޖުމްހޫރިއްޔާ ޑރ.މުހައްމަދު މުއިއްޒު ބަދަލުގެންނެވީ މިދިޔަ ސެޕްޓެމްބަރު މަހުގެ 30 ވަނަ ދުވަހުއެވެ.
ރައްޔިތުން މަޖިލީހުން މިއަދު ނިންމެވި ކަންކަމުގެ ޚުލާސާ:
ފެލިދޫ ދާއިރާގެ މެންބަރު އާދަމް ޒާހިރު ހުށަހަޅުއްވާފައިވާ، ޤާނޫނު ނަންބަރު 13/2008 (އެންޓި-ކޮރަޕްޝަން ކޮމިޝަނުގެ ޤާނޫނު) އަށް އިޞްލާޙު ގެނައުމުގެ ބިލުގެ އިބްތިދާއީ ބަހުސް ކުރިއަށް ގެންދެވުން.
ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 129 ވަނަ މާއްދާގެ (ހ) ގެ ދަށުން ވަޒީރުންގެ މަޖިލީހަށް ރައީސުލްޖުމްހޫރިއްޔާ ޢައްޔަންކުރައްވާފައިވާ 3 ވަޒީރުންނަށް ރުހުންދިނުމުގެ މައްސަލަ، ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން ދިރާސާކޮށް ނިންމިގޮތުގެ ރިޕޯޓު ހުށަހަޅުއްވައި ބަހުސް ކުރިއަށް ގެންދެވުމަށްފަހު، ރައީސުލްޖުމްހޫރިއްޔާ ޢައްޔަންކުރައްވާފައިވާ 3 ވަޒީރުންނަށް ރުހުންދިނުމަށް މަޖިލީހުން ފާސްކުރެއްވުން.
އަލްމަމްލަކަތުލް ޢަރަބިއްޔަތުއްސުޢޫދިއްޔާއަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރު ހަމަޖެއްސެވުމަށްޓަކައި ރައީސުލްޖުމްހޫރިއްޔާ ފޮނުއްވާފައިވާ މައްސަލަ، ޚާރިޖީ ގުޅުންތަކުގެ ކޮމިޓީން ދިރާސާކޮށް ނިންމިގޮތުގެ ރިޕޯޓު ހުށަހަޅުއްވައި ބަހުސް ކުރިއަށް ގެންދެވުމަށްފަހު، މ.ވެސްޓްސައިޑް، އަލްފާޟިލް އަޙްމަދު ސަރީރުގެ ނަންފުޅު މަޖިލީހުން ފާސްކުރެއްވުން.
2024 ވަނަ އަހަރަށް ލަފާކޮށް ހުށަހަޅުއްވާފައިވާ ސަޕްލިމެންޓަރީ ބަޖެޓު، ބަޖެޓު ދިރާސާކުރާ ކޮމިޓީން ދިރާސާކޮށް ނިންމިގޮތުގެ ރިޕޯޓު ހުށަހަޅުއްވައި ބަހުސް ކުރިއަށް ގެންދެވުމަށްފަހު، 2024 ވަނަ އަހަރަށް ލަފާކޮށް ހުށަހަޅުއްވާފައިވާ ސަޕްލިމެންޓަރީ ބަޖެޓު މަޖިލީހުން ފާސްކުރެއްވުން.
މިޖިލީހުގައި މިހާރު ކުރިއަށް މިދަނީ މިއަހަރުގެ ތިންވަނަ ދައުރުގެ ޖަލްސާތަކެވެ.
