ރާއްޖޭގައި އުފައްދާ މަހުގެ ބާވަތްތައް ޗައިނާއަށް އެކްސްޕޯޓުކުރެވޭނެ ގޮތް ހެދުމަށްޓަކައި ޚާއްސަ އެއްބަސްވުމެއްގައި މިއަދު ސޮއިކޮށްފިއެވެ.
މިއެއްބަސްވުމުގައި ސޮއިކޮށްފައިވަނީ ޖެނެރަލް އެޑްމިނިސްޓްރޭޝަން އޮފް ކަސްޓަމްސް އޮފް ދަ ޕީޕަލްސް ރިޕަބްލިކް އޮފް ޗައިނާ، ޖީއޭސީސީ އާއި ރާއްޖޭގެ ސިއްޙަތާ ބެހޭ ވުޒާރާއާ ދެމެދުއެވެ.
ރާއްޖޭގެ ފަރާތުން މި އެއްބަސްވުމުގައި ސޮއި ކުރެއްވީ ސިއްޙަތާ ބެހޭ ވުޒާރާގެ ނައިބު އިސްމާއިލް ޒާހިރެވެ. ޖީއޭސީސީގެ ފަރާތުން ސޮއިކުރެއްވީ ވައިސް މިނިސްޓަރ ހޫ ހައިޕިންގއެވެ.
މިއެއްބަސްވުމާއި ގުޅޭގޮތުން ޒާހިރު ވިދާޅުވީ 2015 ވަނަ އަހަރުން ފެށިގެން މަހުގެ ބާވަތްތައް ޗައިނާއަށް އެކްސްޕޯޓް ކުރުން މެދުކެނޑިފައި އޮތް އޮތުން މިއެއްބަސްވުމުގެ ސަބަބުން ނިމުމަކަށް އަންނާނެ ކަމަށެވެ.
"މިޕްރޮޓްކޯލްގެ ދަށުން ހުއިފިލަނޑާގެ ބާވަތްތަކާއި، ފަރުމަހުގެ ބާވަތްތައް އަދި ކަނޑުމަހުގެ ބާވަތްތައް ޗައިނާއަށް އެކްސްޕޯޓުކުރެވޭނެ،" ޒާހިރު ވިދާޅުވިއެވެ.
"އެފްޓީއޭއަށްވެސް އަންނަ އަހަރު ކުރީކޮޅު އަމަލުކުރަން ފެށޭނެ. މި އެއްބަސްވުމުގެ ސަބަބުން ޗައިނާއަށް މަހުގެ ބާވަތްތައް އެކްސްޕޯޓުކުރުމަށް ރާއްޖެއަށް ފަސޭހަވެގެންދާނެ،" ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަންގ ލީޝިން ވިދާޅުވިއެވެ.
