ހަތަރު ހާސް ސަފްހާގެ ހެއްކާއި ފޮޓޯއާއި ބަޔާނާއި އަދި އިތުރު 750އަށް ވުރެން ގިނަ ސަފްހާގެ ލިޔުންތަކާއެކު ދެކުނު އެފްރިކާއިން އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އަށް ޒަޔަނިސްޓުންގެ ޖަރީމާތައް ސާބިތުކޮށްދޭ ފައިލެއް ހުށަހަޅައިފިއެވެ.
ދެކުނު އެފްރިކާގެ ފޮރިން މިނިސްޓްރީން ނެރުނު ބަޔާނެއްގައި ބުނެފައި ވަނީ އައިސީޖޭއަށް މި ތަކެތި ހުށަހެޅީ ހޯމަ ދުވަހު ކަމަށެވެ. މި ލިޔުންތަކުގައި ނަސްލު ނައްތާލުމަށް ޒަޔަނިސްޓު ޔަހޫދުން މަސައްކަތް ކުރާކަމުގެ ހެކިތައް ހިމަނާފައިވާނެ ކަމަށް ބުނެފައި ވެއެވެ.
ދެކުނު އެފްރިކާއިން ހޭގްގައި ހުންނަ އައިސީޖޭއަށް ޑިސެމްބަރު މަހު މައްސަލައެއް ހުށަހެޅީ، 2023 ވަނަ އަހަރުގެ އޮކްޓޯބަރު މަހުގެ 7 ވަނަ ދުވަހު ހަމާސްއިން ފަލަސްޠީނު މިނިވަން ކުރުމަށް ދިން ކުއްލި ހަމަލާއާ ގުޅިގެން އިޒްރޭލުން ފެށި ނަސްލު ނައްތާލުމުގެ އުދުވާނަށް ފަހުއެވެ.
އެމެރިކާއިން ދެމުންދާ ހަތިޔާރު ބޭނުންކޮށްގެން، ޒަޔަނިސްޓް ސިފައިން ވަނީ ފަލަސްތީނުގެ 42،000 އަށް ވުރެ ގިނަ މީހުން ޝަހީދުކޮށްލާފައެވެ. އަދި ގާތްގަނޑަކަށް 97،000 މީހުން ޒަޚަމްކޮށްފައި ވެއެވެ. އަރަބިންގެ ފަރާތުން ކުށްވެރި ކުރުން ނޫން ބަހެއް ލިބިފައެއް ނުވެއެވެ.
އދން ބުނާ ގޮތުގައި ޣައްޒާގެ 2.3 މިލިއަން މީހުންގެ އާބާދީގެ %90 މީހުން ވަނީ ވަޒަނުން ލުހެލައި ބިކަކޮށްފައެވެ.
