ނޭޓޯއިން ނިއުކްލިއަރ ހަތިޔާރު ބޭނުން ކުރުމަށް ތަމްރީނުތައް ބޭއްވިތާ 15 ދުވަސް ފަހުން މިއަދު ރަޝިޔާގެ ސިފައިން ނިއުކްލިއަރ ހަތިޔާރާ ބެހޭ އަސްކަރީ ތަމްރީނުތައް ފަށައިފިއެވެ. ރަޝިޔާގެ ރައީސް ވްލަޑިމިއާ ޕޫޓިން ވަނީ ސްޓްރެޓެޖިކް ނިއުކްލިއާ ޑިޓަރެންސް އެކްސަސައިޒެއް ފަށާފައިވާކަން އިއުލާން ކުރައްވާފަ އެވެ.
މި ޑްރިލްގައި ބެލިސްޓިކް އަދި ކްރޫޒް މިސައިލް ލޯންޗު ކުރުން ހިމެނޭ ކަމަށް ޕޫޓިން ވިދާޅުވި އެވެ. މި ތަމްރީނަކީ ދުނިޔޭގައި ނިއުކްލިއަރ ބާރުގެ ހަމަހަމަކަން ހިފަހައްޓައި ދޭނެ ކަމެއް ކަމަށްވެސް ވިދާޅުވިއެވެ.
"ޖިއޮޕޮލިޓިކަލް ހަމަނުޖެހުންތައް ބޮޑުވުމުގެ އިތުރުން ބޭރުގެ ހަމަނުޖެހުމާއި ނުރައްކަލަށް ބަލާއިރު، މެދުނުކެނޑި ހަނގުރާމައަށް ތައްޔާރުވެ ތިބޭ ޒަމާނީ ސްޓްރެޓެޖިކް ފައުޖުތައް އޮތުމަކީ، މުހިންމު ކަމެއް،" ޕޫޓިން ވިދާޅުވި އެވެ.
ރަޝިޔާއިން މަސައްކަތް ކުރަނީ ނިއުކްލިއާ ބާރުތައް ދެމެހެއްޓެނިވި ފެންވަރުގައި ބެހެއްޓުމަށް ކަމަށް ވިދާޅުވަމުން ޕޫޓިން ވަނީ، ހަތިޔާރުގެ ވާދަވެރިކަމެއްގައި ރޭސް ޖަހަން ރަޝިޔާ ބޭނުން ނޫންކަމަށް ވިދާޅުވެފައެވެ.
ޕޫޓިން ވިދާޅުވީ މޮސްކޯގެ ނިއުކްލިއަރ ހަތިޔާރަކީ ހުރިހައި ގޮތަކުން ކުރިއަރާފައިވާ ޒަމާނީ ހަތިޔާރުތަކެއް ކަމަށެވެ. އަދި އެ ހަތިޔާރުތަކަކީ އޭގެ އަމާޒަށް ފުރިހަމައަށް ފޯރާފަދަ ހަތިޔާރެއްކަމަށްވެސް ވިދާޅުވިއެވެ.
އޮކްޓޯބަރު މަހުގެ 14 ވަނަ ދުވަހު ނޭޓޯއިން ވަނީ ފުޅާދާއިރާއެއްގެ ނިއުކްލިއާ ޑްރިލްތަކެއް ފަށާފައެވެ. މި ތަމްރީނުގައި ގާތްގަނޑަކަށް 2،000 ސިފައިންނާއި 60 އަށް ވުރެ ގިނަ މަތިންދާބޯޓު ބައިވެރި ކޮށްފައި ވެއެވެ.
