އިސްލާމިކް ރެސިސްޓެންސް ޖަމާޢަތް ޙިޒުބުﷲގެ އޮޕަރޭޝަންސް ރޫމުން ނެރުނު ބަޔާނެއްގައި ބުނަނީ، ފާއިތުވި ދުވަސްތަކުގައި ހިޒްބުاللهގެ ދުވަހުން ދުވަހަށް ހިންގާފައިވާ ހަރަކާތްތައް ފާހަގަކުރެވޭ މިންވަރަށް އިތުރުވެފައިވާކަމަށެވެ.
އާ ތަފާސްހިސާބުތަކުގައި އޮޕަރޭޝަންސް ރޫމުން ކަށަވަރުކޮށްދީފައި ވަނީ، އެއްގަމު މަގުން އަރައިގެން ޒަޔަނިސްޓުންނާ ކުރިމަތިލާން ފެށުނު ފަހުން، ޒަޔަނިސްޓުންގެ އޮފިސަރުންނާއި ފައުޖީންގެ ތެރެއިން 90 މީހުން ނައްތާލާފައިވާ ކަމަށެވެ. އަދި 750 އަށް ވުރެ ގިނަ މީހުން ނުކުޅައްދާފައިވާ ކަމަށެވެ.
އޭގެ އިތުރުން، 38 މެރްކާވާ ޓޭންކާއި، 4 އަސްކަރީ ބުލްޑޯޒަރާއި، ހަމަރ އާއި، އާމަރޑް ވެހިކަލަތަކާއި، ޓްރޫޕް ކެރިއަރ އެއް ނައްތާލެވިފައިވާ ކަމަށްވެސް ބުނެފައި ވެއެވެ. އަދި ހާރމީޒް 450 ގެ ޑްރޯނަކާއި ހަރމިޒް 900 ގެ ޑްރޯނެއް ވައްޓާލާފައިވާކަން ވެސް ކަށަވަރުކޮށްދީފައިވެ އެވެ.
އޭގެ އިތުރުން ޙިޒުބުﷲ އިން ބުނީ އިޒްރޭލު އެތެރެއަށާއި ބަސްތީތަކަށާއި ސިފައިންގެ މައުކަޒުތަކަށް ޙަމަލަ ދީގެން ދީފައިވާ ގެއްލުމާއި މަރާލާފައިވާ މީހުންނާއި ނުކުޅައްދާފައިވާ މީހުންގެ އަދަދު މީގައި ނުހިމެނޭ ކަމަށެވެ.
ޙިޒުބުﷲ އިން ބުނީ މިހާރު ދެމުންދާ ޙަމަލަތައް އިޒްރޭލުގެ 145 ކިލޯމީޓަރު އެތެރެއަށް ފޯރާފައިވާ ކަމަށެވެ. އަދި އެއްމަސް ދުވަސް ތެރޭގައި 150 ޑްރޯން ހަމަލަ ދީފައިވާނެ ކަމަށެވެ.
ޙޒުބުﷲ އިން ހަމަލަ ދެމުންދަނީ ޚައިބަރު އޮޕަރޭޝަންގައި ލައްބައިކަ ނަޞްރަﷲ ޝިއާރުގެ ދަށުންނެވެ.
ދެކުނު ލުބުނާނަށް ޙަމަލަ ދޭންފެށިފަހުން ސިފައިން މަރުވާ އަދަދު ގިނަކަމަށް ބުނެ މިއަދުގެ ޖެރޫސަލަމް ޕޯސްޓްގައިވެސް ނުތަނަވަސްކަން ފާޅުކޮށްފައި ވެއެވެ. އެ ނޫހުގައި އަސްކަރީ ތަޖުރިބާކާރު، އާމޫސް ގިލްއާދު ޒަޔަނިސްޓު ސަރުކާރަށް ގޮވާލާފައި ވަނީ، އެމެރިކާ މެދުވެރިގެން ސުލްހައިގެ ވާހަކަތައް ދައްކައިގެން ސަލާމަތުން ލުބުނާނުން ބޭރުވާށެވެ.
