ބާސެލޯނާއަށް ސޮއިކުރުމަށް ޑެނީ އޮލްމޯ އެއްބަސްވެއްޖެއެވެ.
އިތުބާރުހުރި ޖާނަލިސްޓް ފަބަރީޒިއޯ ރޮމާނޯ ހާމަކުރި ގޮތުގައި ބާސެލޯނާއިން ހުށަހެޅި 6 އަހަރުގެ ކޮންޓްރެކްޓުގައި ސޮއިކުރަން އޮލްމޯ އެއްބަސްވެއްޖެއެވެ.
ބާސާގެ ކޮންޓްރެކްޓުގައި ސޮއިކުރަން އޮލްމޯ އެއްބަސްވި ކަމުގައިވިއަސް, އޭނާގެ ކްލަބު ކަމުގައިވާ އާރްބީ ލެއިޕްޒިގްއިން އޭނާ ވިއްކަން ބޭނުންނުވާ ނަމަ އޮލްމޯއަށް ބާސާގެ ކޮންޓްރެކްޓުގައި ސޮޔެއްް ނުކުރެވޭނެއެވެ.
އޮލްމޯ ގެނައުމަށް ޓަކައި ބާސާއިން ވަނީ 70 މިލިއަން ޑޮލަރާ ގާތް ކުރާ އަދަދެއްގެ ފީއެއް ހުށަހަޅާފައެވެ. ނަމަވެސް ރިޕޯޓުތަކުން ލަފާކުރާ ގޮތުގައި ބާސާގެ މި ބިޑު ލެއިޕްޒިގްއިން ގަބޫލެއް ނުކުރާނެއެވެ. ބާސާގެ ފީ ބަލައިގަންނަން ލެއިޕްޒިގްއިން ދެކޮޅު ހަދައިފިނަމަ އޮލްމޯ ބާސާއާ ގުޅެން ބޭނުންވިއަސް އޭނާއަށް އެ ފުރުސަތެއް ނުލިބޭނެއެވެ.
މި އަހަރު އޮތް ޔޫރޯގައި ތަފާތު މޮޅު ކުޅުމެއް ދެއްކި އޮލްމޯއަކީ މި ވަގުތު ޔޫރަޕުގެ އެތައް ކްލަބަކުން ފާރަލަމުން އަންނަ ކުޅުންތެރިޔެކެވެ. އޭނާ ވަނީ މި ދިޔަ ސީޒަނުގައި ލެއިޕްޒިގަށް 25 މެޗު ކުޅެދީ 8 ލަނޑު ކާމިޔާބު ކޮށް, 5 އެސިސްޓު ފޯރުކޮށްދީފައެވެ.
