އދ. މަހިބަދޫ އިންޖީނުގޭ ފުރާޅުގައި ސޯލާ ހަރުކޮށް ބޭނުން ކުރަން ފަށާފައިވާކަމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ވިދާޅުވެއްޖެއެވެ.
ސްޓެލްކޯ އިން ވިދާޅުވީ މިއީ ސަރުކާރުގެ ސިޔާސަތުތަކާއި އެއްގޮތަށް ތެލަށް ބަރޯސާވާމިންވަރު ކުޑަކޮށް، އިޔާދަކުރަނިވި ހަކަތައަށް ކުންފުނި ދީލާލުމަށް ކުރެވޭ މަސައްކަތުގެ ދަށުން ކުުރިއަށް ގެންދާ މަސައްކަތެއްކަމަށެވެ.
އިޔާދަކުރަނިވި ހަކަތަ ބޭނުންކުރުން އިތުރުމުރުމަށް ސްޓެލްކޯއިން އަންނަނީ އެތަކެއް މަސައްކަތްތަކެއް ކުރަމުންނެވެ. މިގޮތުން، ކ. ގުޅިފަޅު، އދ. ދިއްދޫ އަދި ވ. ރަކީދޫ ފަދަ މުހިންމު ތަންތަނުގައި ހައިބްރިޑް ސޯލާ އަދި ބެޓެރީ ނިޒާމުތައް ކާމިޔާބުކަމާއެކު ޤާއިމުކުރެވި، އަދި ވ. ކެޔޮދޫ އާއި އދ. ކުނބުރުދޫގައި ފްލޯޓިންގ ޕީވީ ނިޒާމުތައް ބެހެއްޓިފައިވެއެވެ.
އިތުރަށް ސާފު ހަކަތައިގެ ހައްލުތައް ފުޅާކުރުމަށްޓަކައި، ވައިގެ ހަކަތަ އަދި ކަނޑުގެ ހަކަތަ ފަދަ އައު އިއާދަކުރަނިވި ހަކަތައިގެ ވަސީލަތްތައް ދިރާސާކުރަމުން ގެންދާ ކަމަށްވެސް ސްޓެލްކޯއިން ވިދާޅުވެފައިވެއެވެ.
