އުތުރުގައި އިންޓަރނޭޝަނަލް ބަންކަރިންގ ޚިދުމަތް ފެށުމަށް ބޭނުންވާ ޕައިލެޓް ބޯޓާއި ޓަގް ބޯޓް ކުޅުދުއްފުށި ސިޓީ ޕޯޓަށް މިއަދު ގެނެސްފިއެވެ.
މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ދަނީ ރާއްޖޭގެ އުތުރުގައި އިންޓަރނޭޝަނަލް ބަންކަރިންގ ޚިދުމަތް ފެށުމަށް ގިނަގުނަ މަސައްކަތްތަކެއް ކުރަމުންނެވެ. މިގޮތުން އެމްޕީއެލްގެ ސީއީއޯ މުޙައްމަދު ވަޖީހް އިބްރާހީމް މިހާރު ގެންދަވަނީ ރާއްޖޭގެ އުތުރަށް ޒިޔާރަތް ކުރައްވާ އެކި މަސައްކަތްތައް އިފްތިތާހުކުރައްވަމުންނެވެ.
މިދަތުރުފުޅުގައި އެމްޕީއެލްއިން އުތުރުގައި ފެށުމަށް ހަމަޖެހިފައިވާ މެރިޓައިމްގެ ޚިދުމަތްތަށް ގާއިމު ކުރުމުގެ ގޮތުން ހއ. ތުރާކުނުގައި ވޯޓަރ ބަންކަރިންގެ ޚިދުމަތް ވަރަށް އަވަހަށް ފަށާނެކަމަށްވެސް ހާމަކުރައްވާފައެވެ. ވޯޓަރ ބަންކަރަކީ ތުރާކުނަށް އަރާ އުޅަނދުފަހަރަށް ބޭނުންވާ ފެން ފޯރުކޮށްދިނުމަށްޓަކައި ޤާއިމްކުރެވޭ ވަސީލަތެކެވެ. އެމްޕީއެލްއިން މަޢުލޫމާތު ދެއްވާފައިވާ ގޮތުގައި، ކައުންސިލުގެ އެދުމުގެ މަތިން މި ޚިދުމަތް ފޯރުކޮށްދިނުމަށް ބޭނުންކުރާނެ ފްލޯޓިންގ ބާޖް ބަހައްޓާނީ ތުރާކުނުގައެވެ.
އަދި އުތުރުގައި ބައިނަލްއަޤްވާމީ ފެންވަރުގެ ބަންކަރިންގ ޚިދުމަތް ތަޢާރަފުކުރުމަށްޓަކައި އެމްޕީއެލްއިން ކުރަންޖެހޭ އެންމެހައި މަސައްކަތްތައް ކުރިއަށްދާކަމަށް އެ ކުންފުނިން ހާމަކުރައްވައެވެ.
ތުރާކުނުގައި ވޯޓަރ ބަންކަރިންގ ޚިދުމަތް ޤާއިމްކުރުމުގެ އިތުރުން، އެމްޕީއެލްއިން ވަނީ އުލިގަމު ޔޮޓް މެރީނާ ތަރައްޤީކޮށް، އެ ރަށުގައި ކަނޑުދަތުރުފަތުރާ ގުޅުންހުރި އެކިއެކި ޚިދުމަތްތައް ފޯރުކޮށްދިނުމަށް ރަށު ކައުންސިލާއެކު އެއްބަސްވުމެއްގައި ސޮއިކުރައްވާފައެވެ.
ދިވެހިރާއްޖޭގެ އިޤްތިޞާދީ ކުރިއެރުން އިތުރުކުރުމަށް މަސައްކަތްތަކެއް ކުރެވެމުންދާއިރު، އުތުރުގެ ރަށްތަކަކީ ޤައުމުގެ މުޅި އިޤްތިޞާދީ ތަރައްޤީއަށް ހިއްސާކުރާ މުހިންމު އިޤްތިޞާދީ މަރުކަޒަކަށް ހެދުމަށްޓަކައި ސަރުކާރުން ވަނީ އެތައް މަސައްކަތްތަކެއް ފަށާފައެވެ.
