ކުޅުދުއްފުށި ސިޓީ ޕޯޓްގައި ޤާއިމްކުރާ ބޯޓް ޔާޑު މަސައްކަތުގެ 95 އިންސައްތަ މިހާރު ފުރިހަމަ ކުރެވިފައިވާކަމަށް މޯލްޑިވްސް ޕޯޓްސް ލިމިޓެޑް (އެމް.ޕީ.އެލް) އިން ވިދާޅުވެއްޖެއެވެ.
ކުޅުދުއްފުށި ޕޯޓްގެ ސަރަހައްދުގައި ޑޮކްޔާޑަށް ހަދާ 15،000 އަކަ ފުޓޫގެ އިމާރާތުގެ މަސައްކަތް ކުރިއަށްދާ ގޮތް ބައްލަވާލެއްވުމަށް އެމް.ޕީ.އެލްގެ ސީ.އީ.އޯ މުހައްމަދު ވަޖީހް އިބްރާހިމް އަދި މެނޭޖްމަންޓްގެ ބައެއް ބޭފުޅުން ކުޅުއްދުއްފުށި ޕޯޓަށް ހުކުރު ދުވަހު ވަޑައިގެންފައިވެއެވެ.
ބޯޓް ޔާޑްގެ މަސައްކަތުގައި މިހާރު ކުރިއަށް ދަނީ ވޯކްޝޮޕްގެ ފިނިޝިންގެ މަސައްކަތްތައްކަމަށް އެމް.ޕީ.އެލްއިން ވިދާޅުވިއެވެ. އަދި އެމް.ޕީ.އެލްއިން މައުލޫމާތުދޭ ގޮތުގައި، ފިނިޝިންގ މަސައްކަތްތައް ނިންމުމަށްފަހު، މި ހިނގާ އޯގަސްޓް މަހުގެ ތެރޭގައި ބޯޓް ޔާޑުގެ ޚިދުމަތް ފެށޭނެ ކަމަށް ލަފާކުރެވެއެވެ. ޚިދުމަތް ފެށުމުގެ ކުރިން، ޑޮކްޔާޑަށް ބޭނުންވާ މުވައްޒަފުން ހޯދުމަށް އިޢުލާން ކުރެވޭނެކަންވެސް އެމް.ޕީ.އެލްއިން ވިދާޅުވިއެވެ.
ސީ.އީ.އޯ ވަޖީހް ވިދާޅުވީ އުތުރުގައި މެރިޓައިމްގެ ޚިދުމަތްތަކެއް ފެށުމަށް ތައްޔާރުވެފައިވާ ދަނޑިވަޅެއްގައި، މި ބޯޓް ޔާޑަކީވެސް މެރިޓައިމްގެ ޚިދުމަތުގައި މުހިންމު ބަޔަކަށްވާނެ ކަމަށެވެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ސަރުކާރުން މެރިޓައިމް ދާއިރާ ފުޅާކުރުމަށް ރާވައިފައިވާ ޕްލޭންތަކުގެ ދަށުން، އުތުރުގައި މެރިޓައިމްގެ ގިނަ ޚިދުމަތްތަކެއް ފެށުމަށް ދަނީ ތައްޔާރުވަމުންނެވެ. އެގޮތުން އިންޓަރނޭޝަނަލް ބަންކަރިންގ ޚިދުމަތް ފެށުމާއި ޔޮޓް މެރީނާއެއް ޤާޢިމްކުރުމުގެ ފެށުމުގެ މަސައްކަތްތައް ވަރަށް ހަލުވި ސްޕީޑެއްގައި އެބަ ކުރިއަށްދެއެވެ.
މި އިންޓަރނޭޝަންލް ބަންކަރިންގ ޚިދުމަތް ފެށުމަށްޓަކައި މިހާރެ ކުރިއަށްދަނީ އެންމެ ފަހުގެ ތައްޔާރީތައް ކަމަށާއި މި ޚިދުމަތް ފެށުމަށް ބޭނުންވާ އޮފީސް ޖާގަތައް ހެދުމުގެ މަސައްކަތްވެސް ދަނީ ވަރަށް ހަލުވި ދުވެއްޔެއްގައި ކުރިއަށްގެންދަމުން ކަމަށް އެމް.ޕީ.އެލްއިން ވިދާޅުވެފައިވެއެވެ. މިގޮތުން، މި މަހުގެ 15 ވަނަ ދުވަހުގެ ނިޔަލަށް މި މަސައްކަތިތައެވެސް ނިމޭނެ ކަމަށް ލަފާކުރެވޭ ކަމަށް އެމް.ޕީ.އެލްއިން މައުލޫމާތުދެއެވެ.
