އިނގިރޭސިވިލާތުގައި މުސްލިމުންނާ ދެކޮޅަށް މިހާރު ހިނގަމުންދާ މުޒާހަރާތަކާ ގުޅިގެން، އެ ޤައުމުގައި ދިރިއުޅޭ އަދި ދަތުރުކުރާ އެންމެހާ ދިވެހިންނަށް ސަމާލުވުމަށް ޚާރިޖީ ވުޒާރާއިން އިލްތިމާސްކޮށްފައެވެ.
އިނގިރޭސިވިލާތުގެ ހުޅަނގު އުތުރުގައި ހިމެނޭ ސައުތްޕޯޓުގައި ހިނގި ކުޑަކުދިންގެ ޑާންސް އަދި ޔޯގާ ކްލާހަކަށް ވަޅިން ހަމަލާދިނުމުގެ ހިތާމަވެރި ހާދިސާގައި 3 ކުޑަ ކުދިން ނިޔާވުމާ ގުޅިގެން، މުސްލިމުންނާ ދެކޮޅަށް މިހާރު ހިންގަމުންދާ ސިލްސިލާ މުޒާހަރާތަކާއި ހަރަކާތްތައް، އިނގިރޭސިވިލާތުގައި ހުންނަ ދިވެހިރާއްޖޭގެ ހައިކޮމިޝަނުން ދަނީ ސަމާލުކަމާއެކު ވަރަށް ގާތުން ބަލަމުންކަމަށް ޚާރިޖީ ވުޒާރާއިން ވިދާޅުވިއެވެ.
މި ޙާލަތާ ގުޅިގެން، އިނގިރޭސިވިލާތުގައި ދިރިއުޅޭ ދިވެހިންނާއި އިނގިރޭސިވިލާތަށް ދަތުރުކުރާ ދިވެހިން، އަދި ވަކިން ޚާއްޞަކޮށް ސައުތްޕޯޓް އަދި އެތާގެ ވަށައިގެންވާ ސަރަޙައްދުތަކުގައި ދިރިއުޅޭ ފަރާތްތަކުން، އިތުރު ސަމާލުކަންދިނުމަށް މ ޚާރިޖީ ވުޒާރާއިން އިލްތިމާސްކޮއްފައިވެއެވެ.
އެންމެހައި ފަރާތްތަކުން އިންތިހާއަށް ފަރުވާތެރިވެ، އަބަދުވެސް އެންމެ ފަހުގެ މަޢުލޫމާތު ހޯދަމުން ގެންދިއުމާއެކު، އަމިއްލަ ރައްކާތެރިކަމަށް އިސްކަންދިނުމަށް ޚާރިޖީ ވުޒާރާއިން އެދިލައްވާފައިވެއެވެ.
މީގެ އިތުރުން، އަމަންއަމާންކަން ގެއްލިފައިވާ ސަރަހައްދުތަކާ ދުރުހެލިވެ، އެ ސަރަހައްދުގެ ކަމާބެހޭ އިދާރާތަކުން ދޭ އެންމެހައި އިރުޝާދުތަކަށް ފުރިހަމައަށް ތަބާވުމަށްވެސް ޚާރިޖީ ވުޒާރާއިން ވިދާޅުވިއެވެ.
އަދި މި ހަމަނުޖެހުންތަކާ ގުޅިގެން އެއްވެސް ބާވަތެއްގެ ކޮންސިއުލަރ އެހީތެރިކަމެއް ބޭނުންވެއްޖެ ހިނދެއްގައި، އިނގިރޭސިވިލާތުގައި ހުންނަ ދިވެހިރާއްޖޭގެ ހައިކޮމިޝަނާ ގުޅުއްވުމަށް ޚާރިޖީ ވުޒާރާއިން އިލްތިމާސްކުރެއެވެ.
ސައުތްޕޯޓްގައި 3 ކުދިން މަރާލުމާ ގުޅިގެން އިނގިރޭސިވިލާތުގެ އުތުރު-އިރުމަތީގައި އޮންނަ ސަންޑަރލޭންޑް ސިޓީގައި އަނިޔާވެރި މުޒާހަރާތަކާއި ހާދިސާތައް ދަނީ ހިނގަމުންނެވެ. މުޒާހަރާކުރި މީހުން ސަންޑަރލޭންޑްގައި ހުރި މިސްކިތަކާ ކައިރީގައި ތިބި ރައިޓް ފުލުހުންނަށް ގާއުކައި، ކާރެއް ރޯކޮއްލާ، އެކި އުޅަނދުތަކަށް ގެއްލުންދީ އަދި ފުލުސް އޮފީހެއްގެ ކައިރީގައި އަލިފާން ރޯކޮށްފައިވެއެވެ.
މި ހާދިސާތައް އިތުރަށް ގޯސްވެގެން ދިޔައީ ސޯޝަލް މީޑިއާގައި ދޮގު މަޢުލޫމާތު ފެތުރުމާ ގުޅިގެންނެވެ. އެގޮތުން ހަމަލާދިން ފަރާތަކީ ހައްދުފަހަނައަޅާފައިވާ މިސްލިމު މުހާޖިރެއްކަމަށް ދޮގު މަޢުލޫމާތު ފެތުރުނެވެ. ނަމަވެސް ލިވަރޕޫލް ކްރައުން ކޯޓްއިން ހާމަކުރިކޮތުގައި ހަމަލާ ދީފައިވަނީ ރުވާންޑާއަށް ނިސްބަތްވާ 17 އަހަރުގެ ކުއްޖެއްކަމަށެވެ. ރުވާންޑާއަކީ މަޖޯރިޓީ ކްރިސްޗިއަން ގައުމެކެވެ.
ސަންޑަރލޭންޑްގައި ބޭއްވުނު މުޒާހަރާއަކީ އިނގިރޭސިވިލާތުގެ އެކި ކަންކޮޅުތަކުގައި މުހާޖިރުންނާ ދެކޮޅަށް ރޭވިފައިވާ މުޒާހަރާތަކުގެ ތެރެއިން އެއް މުޒާހަރާއެވެ. މީގެ ތެރޭގައި ސައުތްޕޯރޓްއާ އެންމެ ކައިރި ސިޓީ ކަމުގައިވާ ލިވަރޕޫލްގައި ހުރި މިސްކިތްތަކެއް ކައިރީގައިވެސް މުޒާހަރާކުރޮށްފައިވެއެވެ.
