ވިނަރެސް ފްލެޓަށް ކުރިމަތިލުމުގެ ފުރުޞަތު ހުރިހާ ރައްޔިތުންނަށް ހުޅުވާލައިފިކަމަށް ބުނެ އޮޅުވާލުމުގެ މެސެޖެއް ފެތުރެމުންދާތީ، މިކަމާމެދު ސަމާލުވުމަށް މޯލްޑިވްސް ޕޮލިސް ސަރވިސްއިން އިލްތިމާސްކޮށްފިއެވެ.
މޯލްޑިވްސް ޕޮލިސް ސަރވިސްއިން މަޢުލޫމާތު ދެއްވިގޮތުގައި، ވިނަރެސް ފްލެޓްތަކަށް ދިވެހިރާއްޖޭގެ ހުރިހާ ރައްޔިތުންނަށް ކުރިމަތިލުމުގެ ފުރުޞަތު ހުޅުވާލައިފިކަމަށާއި، އިތުރު މަޢުލޫމާތު ވެބްސައިޓަކުން ލިބެންހުރިކަމަށް ބުނެ ލިންކަކާއެކު ފޮނުވަމުންދާ މެސެޖަކީ ޞައްޙަ މަޢުލޫމާތެއް ނޫނެވެ.
މީގެ އިތުރުން، ފުލުހުން ވިދާޅުވީ މި ލިންކް މެދުވެރިކޮށް ފޭސްބުކް އަދި އިންސްޓަގްރާމްގެ އެކައުންޓްތައް ހެކްކޮށް، އެ އެކައުންޓްތަކުގެ އެކުވެރިންގެ ލިސްޓުގައި ހިމެނޭ ފަރާތްތަކުގެ އަތުން ނާޖާއިޒު ގޮތުގައި ފައިސާ ހޯދަމުންދާކަމަށެވެ.
އެހެންކަމުން މޯލްޑިވްސް ޕޮލިސް ސަރވިސްއިން ވަނީ މިފަދަ ލިންކުތަކަށް ޚާއްޞަ ސަމާލުކަމެއް ދިނުމަށް އާންމުންނަށް އިލްތިމާސްކުރައްވާފައެވެ. އަދި މިބާވަތުގެ މެސެޖެއް ލިބިއްޖެނަމަ، ލަސްނުކޮށް ފުލުހުންނަށް އެކަން އަންގައިދިނުމަށްވެސް އެދިވަޑައިގެންފައިވެއެވެ.
މޯލްޑިވްސް ޕޮލިސް ސަރވިސްއިން މި މައްސަލަ ތަޙުޤީޤުކުރަމުންދާ ކަމަށާއި، މިފަދ އޮޅުވާލުންތަކުން ރައްކާތެރިވުމަށް އާންމުން ސަމާލުވާންޖެހޭ ކަމަށް ވަނީ ވިދާޅުވެފައެވެ.
