ޓެރަރިސްޓް އިސްރާއީލުގެ ބާރުތަކުން ޣައްޒާ ސިޓީގައި ހުރި ދެ ސްކޫލަކަށް ބޮން އަޅައި، މަދުވެގެން ފަލަސްޠީނުގެ 30ރަ އްޔިތުން ޝަހީދުކޮށްލައިފިއެވެ.
މި ހަމަލާ ދެވުނީ ހަސަން ސަލާމާ އަދި ނަސްރު ސްކޫލުތަކަށެވެ. ޕެރަމެޑިކްސްއިން ބުނާ ގޮތުގައި މަރުވި މީހުންގެ ތެރެއިން 80 އިންސައްތައަކީ ކުޑަކުދިންނެވެ.
އަލްޖަޒީރާގެ އަނަސް އަލް-ޝަރީފް، މި ހާދިސާ ހިނގި ތަނުގައި ހުރެ ބުނި ގޮތުގައި މި ހާދިސާގެ ނަތީޖާއަކީ ވަރަށް ބޮޑު ހަލާކެކެވެ. އޭނާ ބުނި ގޮތުގައި އެތަނުގައި ލޭގެ މަންޒަރުތަކާއި، މީހުންގެ ހަށިގަނޑުގެ ބައިތަކާއި، އިމާރާތުގެ ދަށުވެ ތިބި މީހުން ފެނެއެވެ. މި ހާދިސާ ދުށް މީހުން ބުނާ ގޮތުގައި ބިރުވެރި މަންޒަރުތަކެއް އެވަގުތު ފެނިގެން ދިޔައެވެ.
"އެމީހުން މަރާލީ ކުޑަކުދިންނާއި މުސްކުޅިންނެވެ. އެމީހުން މަރާލީ އަންހެނުންނެވެ. ކުޑަކުދިން ކުރީ ކޮން ކުށެއްތޯއެވެ؟" އެއް ޒުވާނަކު ބުނެފައިވެއެވެ.
މި ސްކޫލުތަކުގައި ތިބީ ގެދޮރު ގެއްލިފައިވާ ފަލަސްޠީނު ރައްޔިތުންނެވެ. ޒަޔަނިސްޓް އިސްރާއީލު ސިފައިން ބުނާ ގޮތުގައި އެމީހުން އަމާޒުކުރީ ހަމާސްގެ މުޖާހިދުންނަށެވެ. ނަމަވެސް މަރުވި މީހުންގެ ގިނަ އަދަދަކީ އާންމު ރައްޔިތުންނާއި ކުޑަކުދިންނެވެ.
މިދިޔަ އަހަރުގެ އޮކްޓޯބަރު މަހުން ފެށިގެން މިހާތަނަށް މަދުވެގެން 39،583 މީހުން މަރުވެފައިވެއެވެ. އޭގެ ތެރޭގައި 15،000 ކުޑަކުދިން ހިމެނެއެވެ. އަދި 91،000 އަށްވުރެ ގިނަ މީހުންނަށް ޒަހަމްވެފައިވެއެވެ.
