އިނގިރޭސިވިލާތުގައި ހިނގަމުން އަންނަ އަނިޔާވެރި މުޒާހަރާތަކާ ގުޅިގެން ކުއްލި ކޯބްރާ ބައްދަލުވުމެއް ބޭއްވުމަށް ނިންމާފައިވާކަން އިނގިރޭސިވިލާތުގެ ޑައުނިންގ ސްޓްރީޓުން ނުވަތަ ބޮޑުވަޒީރުގެ އޮފީހުން ކަށަވަރުކޮށްދީފައެވެ.
އިނގިރޭސިވިލާތުގެ އެކި ރަށްތަކާއި ސިޓީތަކުގައި ހިނގި އަނިޔާވެރި ހަމަނުޖެހުންތަކާ ގުޅިގެން 150 އަށްވުރެ ގިނަ މީހުން ހައްޔަރުކޮށްފައެވެ.
މިނިންމުން ނިންމާފައިވަނީ ޔުނައިޓެޑް ކިންގްޑަމްގެ ބޮޑު ވަޒީރު ސަރ ކީރ ސްޓާމަރ ރޯދަރަމްގައި އަސައިލަމް ހޯދާ މީހުން ބައިތިއްބާފައިވާ ހޮޓަލަކަށް ދިން ހަމަލާ ކުށްވެރިކޮށް، އެކަމުގައި ބައިވެރިވި ފަރާތްތަކަށް "ޤާނޫނުގެ ފުރިހަމަ ބާރު" ކުރިމަތިކުރުވާނެކަމަށް ބުނުމަށްފަހުގައެވެ.
މިދިޔަ ހަފްތާގައި ސައުތްޕޯޓްގައި ތިން އަންހެން ކުދިން މަރާލުމާ ގުޅިގެން ރޯދަރަމް، މިޑްލްސްބަރޯ، ބޯލްޓަން އަދި އިނގިރޭސިވިލާތުގެ އެހެން ސަރަޙައްދުތަކުގައި އަނިޔާވެރި ހަމަނުޖެހުންތައް ފެށުނެވެ. ސިޔާސީ ފަރާތްތަކުން ބުނާގޮތުގައި މި ހަމަނުޖެހުންތައް ހިނގާފައިވަނީ ސޯޝަލް މީޑިއާގައި ފެތުރޭ ދޮގު މަޢުލޫމާތާއި ހަރުކަށި ރައިޓްވިންގް ޖަމާޢަތްތަކުން ހަލަބޮލިކަން އިތުރުކުރުމުގެ ސަބަބުންނެވެ.
އެ ތިން ކުދިންނަށް ހަމަލާދިން ފަރާތަކީ ހައްދުފަހަނައަޅާފައިވާ މީހެއްކަމަށް ދޮގު މަޢުލޫމާތު ފެތުރިގެންގޮސް، މުސްލިމުންނާ ދެކޮޅަށް މުޒާހަރާތައް ބާއްވާ، މިސްކިއްތަކަށް ގެއްލުންދީފައިވެއެވެ. ނަމަވެސް ލިވަރޕޫލް ކްރައުން ކޯޓްއިން ހާމަކުރިކޮތުގައި ހަމަލާ ދީފައިވަނީ ރުވާންޑާއަށް ނިސްބަތްވާ 17 އަހަރުގެ ކުއްޖެއްކަމަށެވެ. ރުވާންޑާއަކީ މަޖޯރިޓީ ކްރިސްޓިއަން ގައުމެކެވެ.
ކެބިނެޓް އޮފީސްގެ ބްރީފިންގ ރޫމް އޭ (ކޯބްރާ) ގެ ބައްދަލުވުމުގައި، މިނިސްޓަރުންނާއި، ސިވިލް ސަރވަންޓުންނާއި، ފުލުހުންނާއި، އިންޓެލިޖެންސް އޮފިސަރުން ބައިވެރިވާނެއެވެ. މި ބައްދަލުވުމުގައި ވޭތުވެދިޔަ ހަފްތާ ބަންދުގައި ހިނގި އަނިޔާވެރި ޢަމަލުތަކާ ބެހޭ މަޢުލޫމާތު ސަރުކާރަށް އަޕްޑޭޓްކޮށްދީ، އެކަމަށް ރައްދު ދިނުމުގެ ޕްލޭނެއް އެކުލަވާލެވޭނެއެވެ.
ހޯމް ސެކްރެޓަރީ އިވެޓް ކޫޕަރ ވަނީ ދޮގު މަޢުލޫމާތު ފެތުރުމާއި އަނިޔާވެރި ޢަމަލުތައް ރޭވުމުގައި ސޯޝަލް މީޑިއާގެ ދައުރު ފާހަގަކުރައްވާފައެވެ. އަދި މި ކުންފުނިތަކުން ޒިންމާ ނަގައި، އޮންލައިންކޮށް ހިންގާ ކުށުގެ ޢަމަލުތައް ތަޙްޤީޤުކުރެވޭކަން ކަށަވަރުކުރުމަށް އިލްތިމާސްކުރައްވާފައިވެއެވެ.
