މަރުވެފައި އޮތް މީހަކު ފަޅު ރަށަކުން ފެނިއްޖެ އެވެ.
ފުލުހުން ވިދާޅުވީ ވ. ފޮއްތެޔޮ ބޮޑުފުށިން މަރުވެފައި އޮތް މީހެއްގެ ހަށިގަނޑު ފެނިފައިވާ ކަމުގެ މައުލޫމާތު މިއަދު 11:02 އެހައިކަންހާއިރު ލިބިފައިވާ ކަމަށެވެ.
އެމީހާގެ ހަށިގަނޑު ފެނުނީ އެ ރަށަށް ދަނޑިކަނޑަށް ގޮސް އުޅުނު ބަޔަކަށް ކަމަށް ވެސް ފުލުހުން ވިދާޅުވި އެވެ. އެމީހާގެ ހަށިގަނޑު ފެނިފައިވަނީ ރަށުތެރެއިން ކަމަށް ވެސް ފުލުހުން ވިދާޅުވިއެވެ. މިހާތަނަށް ބެލެވިފައިވަނީ އެމީހާއަކީ ބިދޭސީއެއް ކަމަށެވެ. "މަރުވެފައި އޮއްވާ ފެނުނު މީހަކީ ބިދޭސީއެއް ކަމަށް ބެލެވޭ،" ފުލުހުން ވިދާޅުވި އެވެ.
އެމީހާގެ ހަށިގަނޑު މާލެ ގެނައުމުގެ މަސައްކަތް ކުރަމުންދާ ކަމަށްވެސް ފުލުހުން ވިދާޅުވި އެވެ.
މަރުވެފައި އޮއްވާ ފެނުނު މީހާގެ ހަށިގަނޑުގެ ބޭރުފުށުން ޝައްކު ކުރެވޭ އެއްވެސް ނިޝާނެއް ފެންނަން ނެތް ކަމަށާއި ނަމަވެސް އިތުރަށް ބަލަން ޖެހޭ ކަންތައް ބެލުމަށް ހަށިގަނޑު މާލެ ގެންނަ ކަމަށް ފުލުހުން ވިދާޅުވި އެވެ.
ފުލުހުން ވިދާޅުވީ އެ މައްސަލަ ތަހުގީގު ކުރަމުންދާ ކަމަށެވެ.
