ޒަޔަނިސްޓު އިސްރާއީލުން ގާތްގަނޑަކަށް 90 އެއްހާ ފަލަސްތީނުގެ މީހުންގެ ހަށިގަނޑު ޣައްޒާއަށް އަނބުރާ ރައްދުކޮށްފައެވެ.
މި ހަށިތައް އިސްރާއީލުގައި ގިނަ މަސްތަކެއް ވަންދެން ބެހެއްޓުމަށްފަހު، އަނބުރާ ޣައްޒާއަށް ރައްދުކޮށްފައިވަނީ 7 އޮކްޓޯބަރުގައި ހަމާސްއިން އަތުލައިގަތް އިސްރާއީލުގެ ޤައިދީން ހޯދުމަށް ބޭނުންކުރެވުނު ކަމަށް ބުނެވޭ ރިޕޯޓުތަކެއް ޝާއިޢުވުމާ ގުޅިގެންނެވެ.
ޣައްޒާގެ ސިއްޙަތާ ބެހޭ ވުޒާރާއިން މައުލޫމާތުދޭ ގޮތުގައި އެ ހަށިތައް ވަނީ ކާކުކަން ދެނެގަނެވޭވަރަށްވުރެ ބޮޑަށް ކުނިވެފައެވެ. މިހާރު އެ ހަށިތައް ބޮޑު މަހާނައެއްގައި ވަޅުލުމުގެ މަސައްކަތް ދަނީ ކުރަމުންނެވެ.
މީގެ އިތުރުން، ޣައްޒާގެ ސިއްޙަތާ ބެހޭ ުޒާރާއިން ވަނީ މި ހަށިގަނޑުތައް ޣައްޒާގެ ގަބުރުސްތާނުތަކުންނާއި އެހެނިހެން ތަންތަނުން ނެގިފައިވާ ކަމަށް ކަށަވަރުކޮށްދީފައެވެ. މިއީ އިސްރާއީލުން ޣައްޒާގައި މަރުވެފައިވާ މީހުންގެ ހަށިގަނޑުތަކާއި، އިސްރާއީލުގެ ބަންދުގައި މަރުވެފައިވާ މީހުންގެ ހަށިގަނޑުތަކާއި، އަދި ފަލަސްތީނުގެ ސަރަޙައްދުގެ ތެރެއިން ގަބުރުސްތާނުތަކުން ނެގިފައިވާ ހަށިގަނޑުތައް އަނބުރާ ރައްދުކުރި ހަތަރުވަނަ ފަހަރެވެ.
ޒަޔަނިސްޓު ލަޝްކަރު މި ހަށިތައް ރައްދުކޮއްފައި މިވަނީ ޣައްޒާގައި އަނިޔާވެރިކަން އިތުރުވަމުންދާ ދަނޑިވަޅެއްގައެވެ. އެގޮތުން، ޣައްޒާގެ ސިއްޙީ މިނިސްޓްރީން ބުނާ ގޮތުގައި ވޭތުވެދިޔަ 24 ގަޑިއިރުގެ ތެރޭގައި އިސްރާއީލުގެ ސިފައިންގެ ހަމަލާތަކުގައި މަދުވެގެން 40 މީހުން ޝަހީދުވެފައިވެއެވެ. މި މަރުވި މީހުންގެ ތެރޭގައި ޣައްޒާގެ ފުލުހުންގެ 5 މެމްބަރުން ހިމެނެއެވެ. އެމީހުން ޝަހީދުވެފައިވަނީ ސީދާ އެމީހުންނަށް އަމާޒުކޮށް ދެވުނު ވައިގެ ހަމަލާއެއްގައެވެ. މީގެ އިތުރުން، މި ހަމަލާތަކުގައި އިތުރު 71 މީހުން ޒަޚަމްވެފައިވެއެވެ.
