މެލޭޝިއާގެ ޕަބްލިކް އަދި ސިވިލް ސަރވިސްގެ މުވައްޒަފުންގެ ޔޫނިއަންތަކުގެ ކޮންގްރެސް (ކިއުޕެކްސް) އިން ޑިސެމްބަރު މަހު މުސާރަ ބޮޑުކުރުމުގެ ކުރިން މަސައްކަތުގެ ފެންވަރު ރަނގަޅުކުރުމަށް މެލޭޝިއާގެ ސިވިލް ސަރވަންޓުންނަށް ގޮވާލައިފިއެވެ.
ކިއުޕެކްސްގެ ރައީސް ޑރ. އަދްނާން މަޓް ވިދާޅުވީ، އަންނަ ހަފްތާގައި އާ މުސާރަތައް އިޢުލާނުކުރުމާއެކު، މަސައްކަތުގައި ވަރަށް ބޮޑަށް ހިތްވަރުދީ، ފެންވަރު ރަނގަޅުކުރަން ޖެހޭނެ ކަމަށެވެ.
މެލޭޝިއާާގެ ބޮޑު ވަޒީރު އަންވަރު އިބްރާހިމް ވަނީ 1 މެއި ގައި މުސާރަ ބޮޑުކުރާނެކަން އިޢުލާނުކުރައްވާފައެވެ. އަދި 16 އޯގަސްޓުގައި އިތުރު ތަފްސީލު ހާމަކުރައްވާނެ ކަމަށާއި، ޑިސެމްބަރު މަހު އެކަން ތަންފީޒުކުރައްވާނެ ކަމަށް އަމަނިކުފާނު ވިދާޅުވެފައިވެއެވެ. ޑރ. އަދްނާން ފާހަގަކުރެއްވި ގޮތުގައި މުސާރަ ބޮޑުކުރުމުގެ ކުރިން ސިވިލް ސަރވަންޓުން އިސްނަގައިގެން ޚިދުމަތް ދިނުމުގައި ފެންވަރު ރަނގަޅުކުރުމަށް ސަރުކާރުން އެދިވަޑައިގަންނަވައެވެ.
ސުލްޠާނާ ނޫރު ޒާހިރާ ހޮސްޕިޓަލުގެ އޯޑިޓޯރިއަމްގައި ވާހަކަފުޅު ދައްކަވަމުން ޑރ. އަދްނާން ނަޒާހަތްތެރިކަން ދަމަހައްޓައި، ރައްޔިތުންގެ ފާޑުކިޔުމަށް ހުށަހެޅިދާނެ ކަންކަމުން ދުރުހެލިވުމުގެ މުހިންމުކަމަށް އަލިއަޅުއްވާލިއެވެ. އޭނާ އިތުރަށް ވިދާޅުވީ ސިވިލް ސަރވަންޓުން ވަނީ އަބަދުވެސް ވަފާތެރިކަން ދައްކުވައިދީފައި ކަމަށެވެ. ހާއްސަކޮށް ކޮވިޑް-19 ބަލިމަޑުކަމުގައި ކުރީސަފުގައި މަސައްކަތްކުރި ދުވަސްވަރު މިކަން ހާމަވެހެންދިޔައެވެ.
ޕަބްލިކް ސަރވިސްގެ ޑެޕިއުޓީ ޑިރެކްޓަރ ޖެނެރަލް މުޙައްމަދު ޝައިފުލް އިބްރާހިމް ވިދާޅުވީ، އަންނަ ހަފްތާއިން ފެށިގެން ސިވިލް ސަރވަންޓުންނަށް އެމީހުންގެ އާ މުސާރަ ހިސާބުކުރެވޭނެ ކަމަށެވެ. މިއީ މެލޭޝިއާގެ ތާރީޚުގައި އެންމެ ބޮޑު މުސާރައިގެ މުރާޖަޢާއެވެ. އަދި މި މުރާޖަޢާގައި 13 އިންސަތައިގެ އިތުރުވުމެއް ހިމެނެއެވެ. މިއީ 12 އަހަރަށް ފަހު އެގައުމުގައި މުސާރަތަކަށް ގެނެވުނު ފުރަތަމަ ބަދަލެވެ.
